Minister Lalnghinglova Hmar in Neuhof School Band lawmpuina hun hmang

Aizawl | October 7, 2026: Vawiin chawhnu dar 1:00 khan LESDE Minister Pu Lalnghinglova Hmar chuan ‘Yamaha Teens Rock 2026’-a champion Neuhof School Band te chu MINECO a a office chamber-ah lawmpuina hun a hmanpui. Yamaha Teens Rock hi India ram pum huap a kum 18 chin hnuai lamte music a inelna lian a ni.

Lalnghinglova Hmar chuan,"Mizo tleirawlte, in hlawhtlinna a ropui kan ti a, Mizo mipuite kan lawm a, kan lawmpui tak zet che u a ni. India huap inelnaa pakhatna nih hi a awlsam lova, inelna hrim hrimah hlawhtlinna chang tur hian theihtawp chhuah a ngai thin." tiin a lawmpui thu a sawi a. "In music thiamzia hrethiam turin music thiam nih a ngai lova, kum lamah naupang tê la ni mah ula quality sang tak in nei tawh a ni." a ti.

Yamaha Teens Rock 2026 kharna, Grand Finale hi Pathianni, October ni 4 khan Prestige Centre for Performing Arts, Bengaluru-ah neih a ni a. He inelna a tel tur hian India ram hmun hrang hrang atang inziaklut 680 chuang an awm. India ram hmun hrang hrangah zone a inel niin Neuhof School Band hi Northeast Zone-ah pakhatna an ni a, Grand Finale-a tel tur hian round paltlang tur hi online leh offline audition engemaw zat a awm a ni.

Tourism Minister ni bawk Tetea Hmar chuan Neuhof School chu kumin Winter Festival-ah an talent pholanna hun siamsak an nih tur thu a sawi a. "Mizo mipuite mai ni lo, kan khualzinte hmaah zau zawka in talent neih pholanna hun in nei dawn a, in duh ang takin in lo inbuatsaih ang. Tourism in festival leh event hrang hrang kan neihah te hmasawn zel kan tum a, a tul chuan kan kaldan pawh kan her danglam hret hret dawn a ni." a ti bawk.

Minister hian music thiam leh lehkha thiam a kalkawp thei tih a sawi a, "Thildang thiam leh lehkhathiam hi a kalkawp thei a. Kan tuina te sang zawka kan luhchilh duh avangin zirna kan thlahthlam a thiang lo a ni." a ti.

Vawiin lawmpuina hunah hian Neuhof English Medium School Principal Andrew Lalremkima chuan lawmthu sawiin inelna report a pe a. Minister hian Neuhof School hnena thuziak cheimawi a hlan bakah band member tinte chu lawmpuina thilpek a hlan a ni.

Neuhof School Band member-te hi Principal bakah zirtirtu dangte’n an rawn tawiawm a. Labour, Employment, Skill Development & Entrepreneurship (LESDE) Department atangin Jt. Director T Thangropianga leh officer dangte an tel bawk a ni.

Neuhof School Band Member-te:

1. Sylvia C. Lalmuankimi - Class VIII

2. Elnathan Vanlalnunzira - Class VIII

3. Lalchhanchhuaha - Class VIII

4. Robert Vanlaldina - Class VIII

5. Lalthlamuani Pachuau - Class IX

6. Grace Vannunmawii - Class IX