KM 2,900 chuang zinkawng zawh tur Mizoram Police Motorcycle Rally Team vailiam

Aizawl | Oct 7, 2026: Mizoram Director General of Police Sharad Agarwal, IPS chuan nimin khan PHQ Aizawl atangin Mizoram Police Motorcycle Rally Team chu a vailiam.

Member 8 (pariat) awmna Rally Team hi Team Leader Jeremia Vanlalhmachhuana, MPS, SDPO, Khawzawl chuan a hruai dawn a, bike khalh tu mi 5 (panga) leh a puibawmtu (support staff) mi pahnih te an tel bawk a ni.

Aizawl atanga Ekta Nagar, Gujarat thlen nan hian kilometer 2,900 vel an tlan dawn a ni. He Rally hi India Sorkar, Ministry of Home Affairs thupêk angin, Rashtriya Ekta Diwas Parade, “Ruihhlo Do” (Fight Against Drugs) thupui hmanga buatsaih a ni.

An kal kawngah hian zirna inah drugs chungchang inzirtirna (awareness program) an buatsaih dawn a, Guwahati, Assam-ah North-East state dang Rally Team nen inhmu khawmin, chuta tang chuan Ekta Nagar, Gujarat pan in an kal ho ang a, October ni 31, 2026-a Sardar Vallabhbhai Patel pianchampha (birth anniversary) a lo thlen hunah Rashtriya Ekta Diwas Parade-ah an tel ve dawn a ni.