PRO FIGHT | Sept 14 zanah mipui lawm hlawh Remthanga a inlan leh dawn

Aizawl | Sept 13, 2026: Ni ruk a awl hnuah hruihrual chhungah Lalremthanga Hmar a lut leh dawn a, thawhtanni zan Mizoram Labour Link LPS Pro Fight-ah Ratu rawlthar Malsawmtluanga nen an an inhnek dawn.

Kum 30 mi Sakawrdai boxer hi Pro Fight tan zan thawhlehni khan inhnek hnuhnung berah a inlan a, mipui lawm a hlawh hle. A team-ten 'Zo Awle' tiin an tawiawm a, amah aia kum 10-a upa Khamsuana (Khawkawn) hnar a hnek thisak a, round hnihna a zawh rualin technical knockout-in a chak.

Comedian Search atanga hriat hlawh Remthanga hian flyweight huangah tawn hriat nei lo kum 18 mi Sawmtluanga a hmachhawn leh dawn a, mahnia inzir chawp Ratu rawlthar hian boxing a khelh vawi khatna tur a nih avangin engtiang taka thiam leh tha nge a nih a hriat loh.

Rin hlawh zawk ni chungin hruihrual chhungah Remthanga a lut dawn a, a chak leh a nih erawh chuan a hmabak a hautak tawh dawn. Pro Fight tan zana Orient Goldsmith Fighter of the Night lawmman dawngtu N Lalhruaizela nen an intawng zui dawn a, tawn hriat nei leh thiamna tha pangngai tak nena khel thei Tawipui South boxer hian Johan Lalrindika (ITI Veng) a hneh tawh a ni.

September 14, thawhtanni zanah weight hrang panga atangin inhnek vawi 12 a awm dawn a, a vawi thumnaah Remthanga leh Sawmtluanga an innuai ang.

A hmuna en tur tan ticket pakhat Rs 50-a lei a ngai a, LPS 1 leh LPS youtube channel-ah member tan inhnek zawng zawng live-a pek chhuah a ni a, youtube member ni tur tan Rs 179 chawi a ngai.

------------

Mizoram Labour Link LPS Pro Fight 2026

Zan 6-na : September 14, 2026 (Thawhtanni) - 8:00 PM : Bout 12 @ LPS Arena, Falkland

FIXTURE

FLYWEIGHT

B60 Jacob Lalduhsaka (Chawntlangpui) v Zakaria Lalneihpuia (Ramthar North)

B61 Moses Lawmkimthanga (Nghalchawm) v Kevin Vanlalduhsaka (Bethlehem)

B59 Lalremthanga Hmar (Sakawrdai) v Malsawmtluanga (Ratu)

BANTAMWEIGHT

B62 Joab Lalrinawma (Niawhtlang) v Malsawmtluanga (Bawngkawn)

B63 Bijay Rai (Bawngkawn) v Lalrihlua (Sairang)

B64 Remruatpuia (Lungzarhtum) v Thangbiakdik (Lamka, Manipur)