Mizoram-ah mit pe tura inziaklut mi 9345 awm tawh

Mizoram-ah Mit pe (Eye Donation) tura in register mi 9345 awm tawh

Aizawl | Sept 7, 2026: India ramin kum tina a lo hman thin, mamawhtute hnena a thlawna mit pek leh hemi chungchanga inzirtirna ni "Eye Donation Fortnight" vawi 41-na chu vawiin September 7, 2026 (Thawhtanni) khan Taxation Department Auditorium, MINECO-ah hman a ni a.

Vawiina Eye Donation Fortnight puala hun buatsaih hi National Programme for Blindness & Visual Impairment, NHM bultuma neih a ni a.

NHM Mission Director Dr R Lalchhuanawma'n kaihruaiin H&FW Principal Director Dr. Lalthlengliani chu Khuallian a ni.

Dr R Lalchhuanawma chuan kal khawmte lawmna leh thu tawi sawiin hun a hmang a. India rama mitdel kan neih dan a tarlang a, Midangin mit vâr an lo neih leh theihna tur hian kum khat chhûngin eye donation tam tak kan mamawh a, kan mamawh zât leh kan hmuh zât a in balance lo nasa êm êm a ni a ti. Aizawl Civil Hospital-ah Mizoram Eye Bank kan lo nei ta a. He Eye Bank hi kum 2008, July 31st ah hawn niin, hemi ni atanga ni 27.8.2026 thlenga thih hnua mit donate (Mit pe) tum in register tawh mi 9312 an awm tawh a. Mit dawng tur mit thlak ngai in register hi mi 400 an awm tawh bawk. Tun thleng hian thih hnua mit pe tawh hi mi 632 an ni. (Cornea - 1456) Kumin National Fortnight on Eye Donation hun chhunga mit donate phal, pledge chhang zawng zawng nen chuan mi (9312+33) 9345 an awm tawh a, mit donate, pledge chhang duh hi mi 20 chin an awm chuan a hmunah thawktu ten an pan thei reng a ni. Hrechiang duh tan 03892324564 (Toll Free) ah hian zawh chian theih reng thu a sawi bawk.

Khuallian Dr Lalthlengliani chuan Eye donation chu kan thih hnu atana kan mitdarthlalang (Cornea) phal taka kan pek hi a ni a. Mit pek chu Eye Bank team in rang takin mitthi awmna hmun atang chuan an la thin. Eye bank ah hian Cornea (Mit Darthlalang) chu dah that theih a ni a ti. Eye Bank hmasa ber hi kum 1940 khan New York (USA) ah din a ni a, Mit pe tura intiam hmasa ber chu Dr. Paton niin India ramah pawh 1943-ah Eye bank kan nei tan a, Eye donation hmanga Corneal transplant (Mit Thlak) hmasa ber chu kum 1960-ah Indore (MP) ah neih a nih thu a sawi bawk. Mizoram-ah hian 31st July, 2008-ah Eye Bank hawn niin a kum leh 25th September 2009-ah Eye Donation hmangin Civil Hospital mit Doctor leh Sri Sankaradeva Nethralaya, Guwahati ten nen tang kawpin 1St Corneal Transplant tih a lo ni ta a. Mizoram Eye Bank hi Eye Bank Asociation of India member niin Transplantation of Human Organ Act, 2011 hnuaia register fel thlap a nih thu a sawi.

Eye Donation lo hlawhtlinna atan hian Central Sorkarin ruahmanna siamin kum tinin Eye Donation Fortnight (25th August to 8th September) hman thin a ni a, hemi chhung hian nasa lehzualin hma lak thin a ni a ti a. Mizoramin Eye Bank kan nei ve ta a, he kan Eye Bank neihchhun hian mi inphalte inpekna lo chuan hna a thawk theilo a, Mit Donate-phal an awm a ngai a ni. Tun dinhmun ah pawh Mizoram Eye Bank a mit thlak ngai in register te hi mi 400 an awma, Civil Hospital in mit Transplant an tih tawh hi mi 99 an ni a, waiting list, kan koh nghak mek hi mi engemaw zat an awm bawk. Tin, Synod Hospital, Durtlang hi Eye Donation Centre niin, mit thlak ngai te pawh an thlak thei tawh a, an thlak nual tawh bawk. Tin, Eye Care Hospital-ah pawh mit thlak thin a nih thu leh hemi bak ah hian cornea hi SSN, Guwahati ah thawn thin niin Mizoram atangin a hmangtu tur ten an um thla mai thin bawk a ti.

Dr. Zoremmawii, Eye Specialist, Civil Hospital, Aizawl in powerpoint presentation hmangin Eye Bank hnathawh hrang hrang, mit donate dan leh a him thu a tarlang a, kalkhawm te midangte tan mit donate zel turin a sawm bawk.

Tawnkima, Saitual leh Lalchhandami Leitan hnen atangin khaw hmu tawh lo tur mit donate tutute avanga khua an hmuh leh theih avanga lawmthu sawina neiin mit donate tute chu midangte tana malsawmna thlentu Pathian duhzawng titu te an nih thu an sawi bawk.

He programme hmang tura sawm Govt. Higher Secondary School leh MICE school naupang lo kal te atangin Mit donate tura pledge chhang mi 33 an awm. Anni school pahnih Class XI zirlaite tan Eye Donation chungchangah Slogan writing competition buatsaih a ni bawk. Kum 2025 - 26 chhunga mit pe mi 67 chhungte hnenah chawimawina thuziak (Certificate) sem chhuah a ni bawk. Kum 2026 – 27 July thla thlengin Cornea hi 42 lak ni tawhin mit darthlalang (Cornea) 23 thlak sak an ni tawh bawk.

Dr. Lalnuntluangi Khiangte, Addl. Director cum SPO, NPCB&VI chuan Chanvo neiu hrang hrang te hnenah lawmthu sawina a nei a, Slogan inphuahsiak lawmman semna leh Eye Doner te hnenah lawmthu sawina Citation hlanna hun a hmang bawk.