LPS Pro Fight-a tel turin boxer 275 an inbuk, champion lai pathum nen boxer 278 an tel dawn!

Aizawl | Sept 5, 2026: Mizoram Labour Link LPS Pro Fight-a tel turin boxer 275 an inbuk a, champion lai pathum nen boxer 278 an tel dawn.

Mizoram chhunga leh pawn atangin tel tuma lehkha theh lut mi 336 an awm a, nimin zingah LPS Arena, Falkland-ah an hriselna endikin boxer 275 an inbuk a. Weight hrang panga zingah fly tam berin 74 an ni a, light-ah 61 inbukin an tam ber dawttu a, bantam-ah 58, welter-ah 55 leh middle-ah 27 an inbuk a ni.

Champion lai pathum - Lalrinngheta (fly), Lalkhawngaiha (light) leh F Lalthanliana Junior (middle) te chu title humhim turin a tawpah an inlan dawn a, bantam champion lai Laldinsanga'n title kalsanin a tel dawn lo a, welter title kawltu Lallawmawma'n champion kawnghren kalsanin a inbuk a, weight hrang pahniha champion tumin light-ah a tel dawn a ni.

Pro Fight hnuhnung ber 2024 khan champion laite nen boxer 286 an tel a, tun tumah hian tel tuma hming pe lut thahnem hle mah se champion laite nen kum hnih kal ta aiin boxer pariatin an tlem zawk a ni.

Tuipui boxer Rinngheta kawl mek fly champion kawnghren chhuhsak tuma hming pe lut zingah seed pek pariat an awm a, an zingah hian championship hnih pahnih title fight-a tlawm zawn tawh Vanlalenkawltira a langsar a, Pro Fight-a hriat la hlawh lo boxer beiseiawm Alison M Lalhmangaihzuala (Siata), Moses Lalruatfela (Lawngtlai Vengpui), Freddy Vanlalpeksanga (Electric Veng Lunglei) te an awm bawk a ni.

Dinsanga kalsan bantam title lak tum zingah seed pek paruk an awm ve thung a, College Vaih Siaha boxer beiseiawm L Joseph Buihringpachha leh 2023 title fight-a inlan tawh Pangzawl fighter Ramdinthara bakah amatuer boxing-a sulhnu nei tha Lalruatfela (Phainuam) te chu rinhlawh zinga mi an ni.

Light-ah Khawngaiha champion kawnghren chhuhsak tuma inbuk zingah seed pek pariat an awm a, welter champion lai Lawmawma (Tuipui), title fight hnuhnung vawi hniha chak zo lo zawn lai C Lalhruaitluanga (Cherhlun) leh tun kum hnih chhunga hmasawn Chhiahtlang boxer Lalruatmawia te an langsar.

Welter-ah Lawmawma kalsan champion kawnghren inchuh tur zingah weight hrang pahniha champion tawh HC Lalramfela (Chawngtlai), Pro Fight hnuhnung ber 2024-a hriat hlawh leh title chuh tur zawnna final lut Zoremsanga (Venghlui), amatuer lama hnuhma nei tha leh national gold medal awrh tawh Lalnunzira (Haulawng) te chu seed pek boxer pali zingah an tel a ni.

Middle-ah title fight hnuhnung bera Thanliana laka a tlawmna chhang let turin C Lalhruaitluanga (Chawngtlai) a inbuk a, seed pek pali zingah 2023 welter champion Lalruatzela Hauzel leh Franky H Vanlalruatpuia te an tel bawk a ni.

September 8, kar leh thawhlehni zan dar 8-ah LPS Arena-ah inhnek tan a ni dawn a, September 7, thawhtanni zing dar 10-ah LPS Office, Zarkawtah fixture tar chhuah a ni dawn a, social media-ah puanzar a ni bawk ang.