Lalremruati lehkhabu ziah 'Rilru Pindan' tlangzarh

Aizawl | Sept 4, 2026: Lalremruati Lehkhabu ziah 'Rilru Pindan' chu vawiin khan Minister of State B Lalchhanzova'n Hyve Aizawl City Hall-ah a tlangzarh.

B Lalchhanzova chuan he lehkhabu ah hian kan hringnunah harsatna hrang hrang kan tawhte engtin nge kan lo hmachhawn ang tih zirtirna pawimawh tak tak bakah mahni inhriatchianna leh midangte nena kan khawsakhona kawnga harsatna neiten an tangkaipui theih tur lehkhabu a nih thu sawiin chhiar zui zel chakawm a nih zia a chhiarchhuah aṭanga a hmuhfiah thu a sawi. Minister chuan 2nd Edition pawh chhuak thuai se a duh tih sawiin mite tana malsawmna thlentu a nih zel a beisei thu a sawi a ni.

He huna Lehkhabu sawi hawngtu PL Liandinga pawhin Lehkhabu rotling mizo ina kan nei leh thei chu lawmawm a tih thu sawiin a thawnthu hi a hlu hle a, hetiang lam hawi ziak tur chuan Psychology zir nih a ṭul viau laiin Political Science zirin a ziak chu chhuanawm a tih thu a sawi a, harsatna nei ten an hlawkpui nge a beisei thu a sawi bawk a ni.

'Rilru Pindan' Lehkhabu ziaktu Lalremruati chuan tun hma chuan lehkhabu a chhiar nasat thu sawiin Fa pahnih a neih hnu ah Anxiety nasa tak neiin harsatna tam tak a tawh thu a sawi a, harsatna hrang hrang a tawh laia a mah tanpuitu pawimawh tak chu lehkhabu a chhiar nasat vang a nih thu a sawi a ni. Remruati chuan thawnthu a nih angin tunlai mila a ziah thu a sawi a, he lehkhabu hi Anxiety nei, ruihhlo ngai leh mood in thlak hlawk hlawk thin te bakah mahnia sutkian ngai harsatna tawk thin ten an tangkaipui theih beiseia ziak a nih thu a sawi a ni.

'Rilru Pindan' lehkhabu ah hian hlawm hrang hrang pakua (9) ah then niin phek 202 a chhah a ni a, Lehkhabu dawr hrang hrang ah ₹250 lei theih in a awm a ni.