HOCKEY | Women’s Junior Asia Cup, 2026 champion team-ah Mizo nula pahnih - PC Lalrinpuii leh F Lalbiaksiami te an tel

Aizawl | Sept 14, 2026: Hockey Women’s Junior Asia Cup, 2026-ah India an champion a, champion team-ah Mizo nula pahnih; PC Lalrinpuii leh F Lalbiaksiami te an tel.

Sports Minister Lalnghinglova Hmar chuan Mizo tleirawl pahnih - PC Lalrinpuii leh F Lalbiaksiami - te telna India team Women’s Junior Asia Cup, 2026 a an champion chu a lawmpui thu a sawi.

Tetea Hmar chuan Facebook kaltlangin lawmpuina thu hi sawiin Mizo nulate a chhuang takzet a ti a, an kal zelna turah duhsakna a hlan a ni.

South Tuipui MLA Jeje Lalpekhlua pawhin, "congratulations em em. Theihtawp lo chhuah zawm zel la. Mizo nih ti nuamtu lo ni zawm zel ang che," tiin rinpuii post-ah comment a hnutchhiah.

Hnahthial tleirawl PC Lalrinpuii hi inhliam vangin a tir match hnih bak a khel chhunzawm thei lo a. Lunglei tleirawl F Lalbiaksiami hi alternative player-ah a awm bawk. An pahnih hian Thenzawl-a Women’s Hockey Academy atanga zirchhuak ve ve an ni.

Women’s Junior Asia Cup final hi Moqi, China-ah khelh niin, India hian Final ah China tumin sikhat faiin an chak a. Junior Hockey World Cup 2027 khel turin an tling nghal a ni.

PC Lalrinpuii hi Lalremsangi leh Lalrinsanga fanu niin, Hnahthial khua a ni a. F Lalbiaksiami hi F Lalsangzuala fanu niin, Lunglei Electric veng mi a ni thung.

PC Lalrinpuii leh F Lalbiaksiami hi an thiannu Lalneihpuii nen July thla khan Hockey India Women Under 21 team United Kingdom (UK) Tour-ah an lo tel tawh a, July 5 - 14 chhunga Under 21 United Kingdom tour-ah hian Edinburgh, Scotland leh Lilleshall, England-ah te an khel a ni.