Chief Electoral Officer-in SIR 2026 kalpui mek chungchangah Champhai Zotlanga Delete Kohhran a tlawh

Aizawl | September 4, 2026: Zan khat riaka Champhai District tlawh mektu Chief Electoral Officer (CEO) Garima Gupta chuan nimin lama Election kaihhnawih official-te bakah, tlawmngai pawl leh political party aiawh te a kawm hnuin, vawiin khan Zotlangah Delete Kohhran te a tlawh.

CEO hian Special Intensive Revision neih mekah Roll-a an inziah luh duh loh chhan a hmun ngeia tlawhin a zawtfiah a, anni pawhin ṭha taka lo dawngsawngin inkawmhona ṭha tak an nei a ni. Delete Kohhrante hian an sakhuana nena a inrem loh vangin Roll-ah chuan an duhthu ngeia awmlo an nih thu CEO hi an lo hrilh a ni. He hunah hian Garima Gupta hi Joint CEO Ethel Rothangpuii, Champhai Election Officer Ngulzaṭhuama leh 24- Champhai South AERO Lalchhuanawma Ralte ten an ṭawiawm a ni.

Election Commission of India chuan Electoral roll felfai leh thianghlim a awm theih nan, roll-a awm lo tur te an awm loh nan leh, roll a awm thei, India khua leh tuite an awm ngei theih nan Special Intensive Revision 2026 chu ngawrh takin a kalpui mek a, tunah hian a hmawr bawk tawh niin, September ni 7 (Thawhṭanni) zing dar 11-ah Final Electoral Roll chu tlangzarh a ni dawn a ni.