CADC hnathawktu 211 ten thla li chuang hlawh an lak loh chungchangah Gauhati High Court-in kar li chhhunga insawifiah turin Mizoram sorkar, CADC Chairman leh Executive Secretary-te hriattir

~ JC Lalnunsanga

Aizawl | Sept 8, 2026: CADC hnathawktu 211 ten thla li chuang hlawh an lak loh chungchangah Gauhati High Court-in kar li chhhunga insawifiah turin Mizoram sorkar, CADC Chairman leh Executive Secretary-te hriattir.

Gauhati High Court, Aizawl Bench chuan September 1, 2026 khan Chakma Autonomous District Council (CADC)-a hnathawk 211 ten an hlawh an lak loh chungchang a thubuai thehluh chu a ngaihtuah a, hemi chungchangah hian Mizoram sorkar, CADC Chairman leh Executive Secretary-te chu kar li chhunga insawifiahna pe turin a ti bawk.

He thubuai thehluttu te hi Chakma Autonomous District Council Employees Association-a member te an ni a. CADC hnuaiah hian Grade-III leh Grade-IV hna thawk lai mek an ni. November 16, 2025 atanga March 31, 2026 thleng khan an hlawh hi pek an ni lo a ni.

High Court an pan hmain hnathawktute hian thuneitute hnenah dilna vawi thum an lo thlen tawh a, a hnuhnung ber hi May 5, 2026 khan Deputy Commissioner, Lawngtlai district - cum - Caretaker, CADC hnenah an thehlut a; amaherawhchu an thu thlen te chinfel sak an nih tak loh avangin court hi an pan ta a ni.

Justice Nelson Sailo chuan he thubuai hi a ngaihtuah a, thubuai ngaihtuah a nih chhung hian hnathawktute harsatna thlente ngaihtuahsak a, chinfel sak turin sorkar thuneitute chu a dang lo tih a tarlang bawk. He thubuai hi kar li hnuah ngaihtuah leh a ni ang.

(He thubuai hi N. Nutan Chakma and 210 Ors. vs State of Mizoram & 5ors WP(C)/128/2026 a ni a. Thubuai thehluttu te tan hian Advocate Ashok Kumar Rokhum a ding a, sorkar tan Government Advocate Caroline K. Lungawipuii a ding)

(A ziaktu Pu JC Lalnunsanga remtihnaa https://www.jclalnunsanga.in atanga lakchhawn a ni. ~ Explore Mizoram)

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]