Supreme Court-in Rahul Gandhi chungchanga CBI-ED Investigation thubuai Allahabad HC-a kal mek chu a stay

~ JC Lalnunsanga

Aizawl | Aug 18, 2026: Supreme Court chuan Thawhtanni (August 17) khan Congress hruaitu Rahul Gandhi laka CBI leh ED te chhui zui dilna thubuai, Allahabad High Court-a kal mek chu a stay rih a ni. He thubuai hi Rahul-an a lakluh phu lova hausakna a nei tia an puhna chungchang a ni a. Supreme Court chuan thu thar a chhuah leh hma chu High Court-ah hian CBI leh ED te chu report engmah thehlut rih lo turin thu a pe bawk. Chief Justice Surya Kant, Justice Joymalya Bagchi leh Justice V Mohana te bench chuan he thubuai hi an ngaihtuah a. Allahabad High Court hian thuneitute hnenah puhna awm te hi chhui chianga, a thlen chin Court-a hriattir turin thu a lo chhuah tawh a ni.

Additional Solicitor General SV Raju chuan CBI hian puhna te hi a tak a ni ngei em tih chauh a chhui a, FIR engmah ziah luh a la ni lo tiin a sawi a. Supreme Court chuan thuneitute hian puhna liantham lakah thil an chhui zui thei tih pawm mah se, mi mal nghawng thei thutlukna an siam hmain Court te chuan 'principles of natural justice' an zawm a tul hle a ni a ti. Chuvangin, Supreme Court chuan Allahabad High Court-a thubuai kal mek, August 20-a ngaihtuah leh tura ruahman chu a stay rih a ni. Gandhi hian a thubuai hi Allahabad High Court atanga Delhi High Court-a sawn a nih theih nan petition dang a thehlut bawk(www.jclalnunsanga.in)

(He thubuai hi RAHUL GANDHI Versus S VIGNESH SHISHIR AND ORS Diary No. 47728-2026 (and connected case) a ni a. Thubuai hi AOR Prasanna S kaltlanga thehluh a ni )

(A ziaktu Pu JC Lalnunsanga remtihnaa lakchhawn a ni a, dan leh court thuttlukna thar chungchanga chhiar belh duh tan https://www.jclalnunsanga.in ah hian tlawh theih reng a ni. ~ Explore Mizoram)

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]