PATLING NUTLING AN MANGANG

David Sailo

5th August 2026

An lungawi lova, Badge dum an bel a, hna an thawk duh lova, Aizawla punkhawm tih te a ri leh ta zel. Chinfel thuai ngai a nih hmel.

Tunhma deuh khan Private School (Khawtlang din) te kha Deficit ah hlan kai an ni a, chumi hnu ah Sorkar ah (Provincialised) an lut ta ṭhin a, tun hnu deuhah kha System kha nuaibo niin Adhoc Aided, Lampsum Aided ti te in thliar hran a ni ta a, tun dinhmunah kan buai ta nuai nuai a nih hi.

SORKAR LAMAH :

Sorkar ah chuan Lumsump Aided ah, Adhoc Aided ah, chuta ṭangin Sorkar a luh dan tehna felfai tak a awm a, Sorkar in hmalakna a puanzar hma khan khauh taka kal tlangpui a nih dawn thu puan a ni a, School hrang hrangin thaw dep dep in an thlir a nih kha.

Sorkar thuchhuak puan chian a ni ta a, vawiin hi kan thleng ta a ni. Kan ri ta luih luih mai a, khauh taka kal tlangpui tumtu pawhin "Hei bak chu..." tiin thiam tawp takin PAC Committee lam te lam rik a ni ta chung mai. MNF Sorkar in Adhoc Aided a School tam tak a hlankai kha Congress hunah khan KIH HNAWK tiin dinhmun ngaia dah an tum viau hman a, mahse khaw tam takin ruai nen an lawm a, thawktute dinhmun an thlir sak a, kal hé lawih lawih dawn mahse huai takin an sulhnu ni miah lo kha an chhunzawm a ni.

THIL MAK THLENG :

Mak deuh chu thil thleng zen zen pawh a ni lo maithei. Sorkar thuchhuah (Gazette) chu School tual zawlah hnathawktu ten Zirlaite hriatpui, hual tuauin an hal miah miah mai a, chumai ni lovin NGO te leh All Political Party aiawh tel veka hal te pawh an awm. Ruling Party aiawh pawh an tel ve ngei ang.

Hei hi chu la hrethiam ta ila, Vanapa Hall kawta punkhawmnaa Banner/Placard pakhatah khan "ZPM Youtuber ten Adhoc Aided High School zirtirtute thudik chanve hmangin bei tawh suh se" tih a inziak kuau mai bawk. Sorkar hnuaia hlawh la ten Sorkar ni lo, Sorkarna chelhtu Party/thlawptu zawk khakna rawngkai hmuh tur awm kha thil thleng khat tak a ni ngei ang.

A TUARTU BEIDAWNNA :

Adoc Aided leh Lumpsum Aided School ah hian kum upa ve tawh tak tak te, khawtlangin School a din tirh aṭanga nakin thlira beiseina sang tak nena thawk ṭauh ṭauh tam tak an awm a, hamṭhatna kawl eng hmu hman ve ta lova retheihpui tluan parh, mual liam ta te leh Pension a maipar thlawn hlawl hlawl an kat nuk tawh bawk. Heng te hi thawk mek te hian an hmu ãwl lova, kawl eng det det thawm awmah hian beiseina sang tak an nei mek a, an beisei loh lam kawng zawhpui ni a an inhriatna hian beidawnna ah a hruailut mek a, pawisak neih lohna a thlen zui zel ang tih pawh hlauhthawn theih a ni ta.

TEHNA HRUI DUL :

Mar tak maia teh an nih chuan School ṭhenkhat, Sorkar a luh hnaihvaih taka inhriate hi chatuan khawvar thlenga Sorkar ni hmu lo tur an awm dawn !! Zirna avanga hlawh tlemte, sawi zahthlak khawpa bul lo ṭan, kum tam tak lo tâl ve hrep tawhte thawhrimna, inpekna leh Zoram, khawtlang zirna chawikangtu pawimawh an lo nih ve ngar ngarna te hi hlut sak a ṭul hle. TEH FUNG ṭan chhan ngur lova, khawngaihna leh hriatthiamna hmanga TEH FUNG DUL zawk duanpui theih a va ṭha em!!

An tlin lohna, an hmuhsitawmna, sawihnâwm theihna tam tak a awm ve bawk ngei ang. DAN MIT kan tih tlat a, Dan siam tuten dan siamṭhat hawipui lova kan melh hru chuan kan lo hmuh fo tawh, beidawng innawrna liantham hial a thleng thei a ni.

HMABAK LEH RAWTNA :

Tun Ministry ṭan tirh deuhah khan CSS ten Regular ngiatin nawrh an huaihawt nasa hle a nih kha. Khatah pawh khan a tam ber chu Education Department hnuai (RMSA/SSA) bawk an ni. Education Department hi a bilh a tho lo hle a, an ni ho hian an thil beisei/nghah mek (File kal muang tak an tih!!) hi beisei loh kawng zawhpui an nih chuan ri hluai thei reng bawk an ni. Contract Teacher te thawm a ri faih faih reng bawk. NAWRH KUM te a inher chhuak ang tih hlauhawm a ni.

Kan hna lak dan lah a bilha tho lo a ni fur mai si, CSS hnuaiah H/S Headmaster lak a ni a, Qualification ah Adhoc Aided/Government High School a kum 5 tal thawk tawh tih te a ni a, Headmaster beiseiin helama thawk tawh, Experience neite an lut a, CSS aṭanga Regular an nih chuan zirtirtu pangngaiah an lut dawn tih thawm te a awm a, ngheh loh chhung zawng atana Headmaster tura lak te an ni awm e !! Kan kalphung hi a mak teh nuaih a nia.

CSS hnuaia hna lak reng reng hi DPC paltlang thlapa lak ni se, a ngheta hna lak tur a awmin heng CSS (Samagra, NHM etc..) hnuaia Experience te hi Seniority in dah nghet zel se. An aiawh tur CSS hnuaiah DPC kal tlangin la zel se buaina awm miah lo tur. CSS Regularisation Scheme tihte pawh hi hetiag a nih chuan a ṭul ber lo hial thei. Pastor pawh Pro-Pastor an ni hmasa phawt a lawm le!!

TLIPNA :

School chungchanga harsatna awm mekah hian thawktute, khawtlang hahpuina kum tam liam tawh te hre rengin Sorkar hian an tana dan chhenfakawm zawk buatsaih sak hram sela, kum tam tak pawl tana Committee ho ṭhin, a ṭhenin ruai nen an lawm luih luih laiin a ṭhen lungngaiin an kun mek a ni.

Kan Indian pui ngeite pawhin an chan phak loh Tribal Quota pawh kan la hûm ve rân tho hi a.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]