Nihar Kanti Chakma-in a thusawi chungchangah Tlabung Branch YMA leh mipuite lakah ngaihdam dil

Aizawl | August 26, 2026: Ex Minister leh West Tuipui bialtu MLA thin Nihar Kanti Chakma chuan, Tlabung khua chu Chakma-te chenna khaw hlun ni thin anga a sawi chungchangah, ngaihda dil tura phut a nih angin vawiin khan Tlabung Branch YMA leh mipuite lakah ngaihdam a dil.

Mizoram Minister pawh lo ni tawh, West Tuipui bialtu MLA atana tum 5 thlan tlin lo ni tawh, Nihar Kanti Chakma-a'n, Tlabung chu Chakma-te chenna khaw hlun ni thin anga Tlabung a chhalna chu tun hnai khan media hrang hrangah a darh nasa hle a.

Hemi chungchangah hian YMA, Tlabung Branch bakah pawl hrang hrangin thuchhuah an siam zui a. Hemi chungchangah West Tuipui bialtu MLA hlui chuan nimin khan Tlabung Branch YMA leh Mizo mipuite hnenah ngaihdam dilin, media lama a thusawi darh chu Artificial Intelligence-in Chakma tawnga a thu phuah, a sawi chhuah tum dan ni lo deuha a lehlinsak vanga thleng ta niin a sawi a. "Zirlai tha tak min zirtir a, tun hnua fimkhur min zirtirtu tha tak a nih ngei pawh ka beisei a ni," a ti bawk/

Nihar kanti Chakma hi MZP Headquartersm Lunglei chuan ngaihdam dil turin an lo phut tawh a ni.

HRIATTHIAMNA LEH NGAIHDAM DILNA

Artificial Intelligent (AI) hmanga ka Flyer siam chungchangah tum loh deuhin, Tlabung Branch YMA leh khawtlang mipuite pawi ka sawi palh a, Hnam anga inhnialna chawk chhuak thei thil leh midang rilru tina thei ka sawi palh hi pawi ka ti takzet a ni.

Tunlai khawvel thiamnain a ken tel Al hi ka zir tan ve a, motor khalh thiam tir angin ka lo fimkhur tawk lo a, kan tawng (Chakma) a ka ziah, Al hmanga English tawnga ka lehtir chu ngun tak leh fimkhur taka lo enfiah leh nachang ka hre lo a, rin loh deuhin a lo viral ta bawk si a, pawi ka ti takzet a ni.

Abikin, Tlabung Branch YMA leh khawtlang mipui chungah he ka thil tihpalh avang hian thinlung takin hriatthiamna leh ngaihdamna ka dil takzet a ni.

Zirlai tha tak min zirtir a, tun hnua fimkhur min zirtirtu tha tak a nih ngei pawh ka beisei a ni.

In khawngaihna diltu,

(NIHAR KANTI CHAKMA)

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]