MZP Lunglei in Lunglei khawpui chhunga College Students Union hruaitu tling tharte lawmpuina hun hmang

Aizawl | August 22, 2026: Mizo Zirlai Pawl Headquarters (MZP Hqrs), Lunglei chuan vawiin chawhma khan LDP Park Pukpuiah Lunglei khawpui chhunga College Students Union hruaitu tling tharte lawmpuina hun an hmang a. He hunah hian hruaitu hlui ngaihhruina an hlan nghal bawk.

‘SU tling tharte lawmpuina’ hun hi MZP Hqrs Lunglei Vice President C Lalsiamthara'n kaihruaiin, Lunglei Municiap Council (LMC)-a Finance and Accounts Officer Lalrinzuali MFAS chu Special invitee ah hman niin MZP Hqrs Lunglei President H Lalhmingmawia chuan thu sawiin SU te chu college tana thil tum nei turin a fuih a, Zirlaite tana an hmaa ding ngam turin a chah a, hruaitu hluite political party a lut thenkhat te pawh, Party hmangaih ringawt loin Mizoram leh Lunglei hmangaihna avanga Party luhchilh turin a ngen a ni.

Lalrinzuali chuan thu sawiin SU leaders te chu theih tawp chhuaha zirlaite tana hma la turin a fuih a, MZP sawi chhiatnate chu ngai pawimawh lo tur leh MZP in hma alo lak tawhnate hre reng tur leh zirlai hrang hrangte mi ṭha leh mi chhia awm mahse ang khata en zel turin SU leaders te chu a hrilh a. Zir thiamna hmanga ram leh hnam tana theih tawp chhuaha zirlaite tana hma la turin SU hruaitute chu a ngen a, SU nih vanga zirlai thlahthlam mai lo tur leh zirlaite tana entawntlaka awm turin SU leaders te chu a fuih bawk a ni.

MZP Hqrs, Lunglei buatsaiha ‘SU leaders tling tharte lawmpuina’ hunah hian MZP Hqrs, Lunglei aṭanga hruaitu hlui political party a lut ta te ngaihhruina hun hman a ni a. LMC Ward IV Councillor R Lalramzauva, ZPM Southern Hqrs, Lunglei Secretary Lalpeksanga Chenkual leh Lunglei District Youth Congress Committee (LDYCC) President Moses Lalrinchhana Chinzah te hnenah ngaihhruina hi hlan a ni.