Aug 17 - 21 chhungin Mizoram Inter Club Boxing C'ship 2026 buatsaih dawn

Aizawl | August 13, 2026: Aizawl District Boxing Association leh Zonet TV Private Limited tangdun chuan August 17 - 21 chhung hian All Mizoram Inter Club Boxing Championship, 2026 an buatsaih dawn.

Inelna hi Ramhlun Boxing Hall-ah neih tura ruahman a ni a, Mipa leh Hmeichhe tan Sub Junior atanga Senior thleng inelna hi buatsaih a ni dawn a, Senior men kum 19 atanga 40 inkar leh Junior men kum 16 atanga 18 inkar tan Category 13 ve veah inelna neih a ni dawn a. Senior Women kum 19 atanga 40 inkar leh Junior women kum 16 atanga 18 inkar tan Category 12 ve ve siam tur niin, Sub-Junior Boys leh Girls kum 12 atanga 15 inkar tan Category 17 siam a ni dawn bawk.

All Mizoram Inter Club Boxing Championship buatsaih tur hian inbuatsaihna ngawrh taka kalpui mek a ni a. Inelna hi Zonet chuan Live in a pe chhuak thin dawn a. Inelnaah hian District-a Affiliated Club te chauh an tel thei dawn a, Club tin atangin Category tinah Boxer pahnih zel tel thei tura ruahman niin, District hrang hrang atangin infiammi tha tak tak an fuan khawm dawn a ni.

Aizawl District Boxing Association leh Zonet tangdun chuan Boxing inelna hi an lo buatsaih tawh thin a. Nikum khan Mizoram Fight Night hlawhtling taka buatsaih niin, kuminah pawh buatsaih leh tur a ni a, tuna Mizoram Inter Club Boxing Championship neih tur pawh hi Mizoram Fight Night lo awm tura inbuatsaihna pakhat a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]