Aibawk-ah dan lova pensio lâk tih reh dan tur sawiho

Aizawl | August 18, 2026: Aizawl North leh South Treasury buatsaihin Vawiin (August 18, 2026 Thawhlehni) khan BNRGSK Hall Aibawkah, dan lova pension/family pension lâk tih reh dan tur sawiho a ni. He hunah hian Aibawk BDO hnuaia veng leh khawtina VC te, YMA leh Kohhran Bial hruaitute, pensioner te, office DDO tin te leh registrar of births & deaths aiawh an kalkhawm a ni.

Dan lova family pension la mek te'n anmahni duhthlanna ngeia an tihtawp (surrender) theih nan Mizoram sawrkar chuan kumin September thla thleng hun a pe a. Chumi hnu lamah chuan ngaihdamna awm tawh lovin, dan hnuaiah thubuai siamsak an nih tur thu Sawrkar thuchuah leh pension dan pawimawh te inzirtirna hun an hmang.

Mizoram Sawrkar hnuaiah dan ang taka family pension la thei tawh lo (Pension Rules in a huam tel loh leh lâk a phal tawh loh), document diklo hmanga family pension la zui mek eng emaw zat an awm nia hriat a ni a. Hemi kawnga Kohhran te, Village Council leh YMA bâkah sawrkar department te leh officer ho mawhphurhna pawimawh zia sawiho a ni. Treasury hotute chuan Kohhran, YMA leh VC hruaitute sawmin, an mi leh sâte dinhmun (nupui/pasal neih emaw pian/thih ni leh eizawnna thu ah te) sawrkara thehluh tur hriatpuina lehkha diktak chauh pe chhuak turin an ngen a ni.

Sawihona hun hmangin kalkhawmte pawhin, theihtawp chhuaha sawrkar thawhpui an tum thu te, a zau thei ang bera lo puanzar ve an tum thu an sawi.

He huna resource person, Pi Lalthanpuii, AA&O chuan, "Mahni duhthu ngeia in surrender te chu sawrkarin a ngaidam hmak dawn a, pawisa in rulhtir a ni lovang. Mahse, September 2026 hnu lamah chuan in ngaihdamna awm tawh lovin, court lamah dan hmangin BNS emaw BNSS hnuaiah thubuai rip tak siam a ni ang a. Pawisa chawi leh jail tan thlengin dan hnuaiah hremna lekkawh a ni ang," a ti.

Dan lova family pension la mekte chu in surrender mai tura thurawnin, pension an lâkna ṭheuh Treasury Office ah surrender-na form hmangin PPO pe kir turin Treasury hotute chuan an sawm a ni. Hun tiam a ral hnu hian Task Force hmangin endik hna thawh tur a ni dawn a. Document diklo pe chhuaktu te pawh dan ang taka an chunga hmalak an tum thu a sawi a ni. Hemi kawnga sawrkar ṭawiawm tlat turin Kohhran hrang hrangte, VC leh YMA te, NGO leh sawrkar hnathawk zawng zawngte an sawm a ni.

He hun hi Allen VL Pundir (Aizawl South Treasury Officer) in kaihhruaiin, Aizawl North Treasury Officer Dr Lalzahawma'n lawmthu a sawi a. Aibawk BDO VL Chaka Hmar in he hun hi a hmanpui bawk. Hetiang 'voluntary surrender of pension payment order' chungchanga in hrilhhriatna (sensitisation) hi district tinah leh block hrang hrangah Treasury Office tinin hun an hmang chho mek a ni.

Thubelh pawimawh:

CCS (Pension) Rules, 1972 hnuaia family pension la thei lote:

1. Family pension la mekin nupui/pasal a neih leh chuan family pension a la thei tawh lo.

2. Sawrkar hnathawk fa hrin ni lo emaw, dan ang taka fa lak ni lo, birth certificate lem siama family pension la te.

3. Sawrkar hnathawk ni reng si, mahni nu emaw pa emaw fate emaw family pension la te.

4. Pensioner ni reng si, mahni nu emaw pa emaw fate family pension la te.

5. Pasal nei reng chung si, pasal neilo anga in ziah a, nu/pa emaw pasal a sûn tâkte family pension la te.

6. Family pension lâk duh avanga mahni nu leh pa te thih ni emaw, pasal te thih ni / inṭhen ni ti danglama family pension la te.

7. Thla khata pawisa lâkluh zawng zawng belhkhawm a, monthly minimum pension @ Rs. 8,700 plus DR income nei pha, tun dinhmunah chuan Rs. 12,702 la tling te.

PRESS STATEMENT

Vawiin (August 18, 2026 Thawhlehni) khan Aizawl North leh South Treasury buatsaihin BNRGSK Hall Aibawkah, dan lova pension/family pension lâk tih reh dan tur sawiho a ni. He hunah hian Aibawk BDO hnuaia veng leh khawtina VC te, YMA leh Kohhran Bial hruaitute, pensioner te, office DDO tin te leh registrar of births & deaths aiawh an kalkhawm a ni.

Sawihona hun hmangin kalkhawmte pawhin, theihtawp chhuaha sawrkar thawhpui an tum thu te, a zau thei ang bera lo puanzar ve an tum thu an sawi.

He hun hi Allen VL Pundir (Aizawl South Treasury Officer) in kaihhruaiin, Aizawl North Treasury Officer Dr. Lalzahawma'n lawmthu a sawi a. Aibawk BDO VL Chaka Hmar in he hun hi a hmanpui bawk. Hetiang 'voluntary surrender of pension payment order' chungchanga in hrilhhriatna (sensitisation) hi district tinah leh block hrang hrangah Treasury Office tinin hun an hmang chho mek a ni.