~ David Sailo
10th July 2026
Kum thum hmel an hmu hnai ta, an dinhmun mek leh dinhmun zel tur thlir sak teh ang.
ARKHAWTHIM DAI:
Sorkar kum khatna an han hmang chho kha chu a arkhawthim dai tak meuh tih kha an zep lem lova, Research Base leh Road Map kha a lar viau lo. Mahse khatih hun lai kha an ngaihawm lai ber a ni!! An hriat tawk loh zia leh thil tih harsat zia an hriat vanglai a ni a, an tlawm a, biak an nuam a, an nih ang ang khan an kal naw naw a ni ber.
A NI LO ZAWNGA HARHNA:
A ram siam tha zawng leh Party hmatlir tihlawhtling zawng nilo, a sum siam thiam zawng, a inhai vur thiam zawngin an thangharh ta emaw tih turin mipui mamawhna an nei tlem tial tial a, an lan danah chuan CHAPO takin an lang tawh!! An tih theih viau leh an tlang viau phei chuan an chapo tial tial emaw tih turin an awm chho ta a. Mipui mamawhna a hniam chhoh viau tawh hi chuan mipui Vote dil ve mai thin an ni tih hi inthlan dawn tlai khaw hnu ah an hre chhuak chauh thin a nia. An tun dinhmunah hi chuan TLAWMNA chu khawnge? tih tur a ni mek.
BEISEINA MEICHHER MIT:
Tun hnaiah Party chhungkuaah neuh neuh boruak kha a kal ta thung thung mai a tih thei. CM leh HM inkar boruak rit takin a delh a, an Worker te an hrilhhai a, awlsam te a siamthat mai theih tura ngaih chu indah NIL tumna in hmun a changsang zawk in a langa, mipui BEISEINA kha CHAPONA in a lem zo mek a ni.
Pawl inkaihhruaina mumal lo an tuar a, a hniam lamah boruak rit a awm lo, a lu lamin an chhem alh hluah hluah mek a ni. A chuanhnuai lam boruak alh pawh chhem mit tur zawk, a lu lam a mut khu vung vung mek zawk a ni. PAC Member pahnihin Sorkar kal tawhte sawi lovin an Sorkar nep zia leh tih dik loh zia an bu zawlah an tlangaupui phiar phiar a, Party mite, Social Media ah takngial pawh an thlalak tarchhuah duhdanah lang ve lo langsar an awm phah nghal chuk bawk !! Hei hi a hringchhuak reng ang chu!!
An tlinna ber Neutral mipui sukthlek phei chu chhut thiam turin an hun tawnin a zir lo. Anmahni pawh an in her rem loh chuan mipui mar deh thiam chu hla tak tawh a ni. Chapona in a hliahkhuh a, lala siamtu an mangnghilh mek a, an duha lal thei emaw an inti mek ani. Heng dinhmun a siamtute hi mi satliah, mi mai mai an ni tih kha kum 2 liamah an mangnghilh deuh der a nih hi!!
CM CIRCLE:
Sorkar hmasa kan hrawn liam tak kan selna ber chu CM khan bial zimte, CM Circle a nei a, khami chhim pha ve lo kha chu Minister pawh nise an ro ngawih ngawih mai a nih kha. Tun Term ah hian CM Circle zimte, thlan ve miah loh Sorkar hnathawk tlemte nena in zar hliah tlat a awm ve em le?
Hetiang awm hian Pawl a khawih pawi thui thei viau mai. Mipui aiawh tura inzawrhpui te nen a thliar hrang zo a, intentawnna, inthlim duhna, inhnualsuat hreh lohna, in chungtlak hreh lohna thlengin a hring thei a ni. Hei hi thiah ngai thil a ni.
COLLECTION OF GROUPS:
MNF te, Congress te anga Party in hlawm tha, Administration fel taka luang ang hi ZPM a nih ve loh zia hi kan hun tawn mekah tumah hrilhfiah kan ngai lo. Group hrang hrang inzawm khawm pawlte hi ZPM ah an Gourp hming chu a dai rawih rawih tur a nih laiin a ri ring thar tial tial hian INHLAWMKHAWMNA fel lo tak, inpumkhat tura tlakchham lianpui an neih mek zia a pho lang.
Inpumkhat thar zel tur hian a chuanhnuai lam aiin a lu bawr lam hian an zir a ngai a, GROUPISM in hmun a chang lian a, ZPM ah an ZPM ho hleithei lo a ni ber mai. ZNP a ri reng a, Exodus, PRISM etc.. heng ho hi ZPM hian a hmet dai thei hlawl lo a ni ber. General Secretary rual pawh khawilam atanga rawn GS nge an nih an inhre fur tlat a lawm!! A hawl darh thiamah chuan an intodelh viau a, a huikhawmtu lam an indaih meuh lo a ang ber. Group te te in an kal a, MPC lam atanga MLA/Minister te pawhin chaw ei khawm an tum ve ringawt an ti!!
AMC KHA:
AMC a an chak chian em em na kha ZPM tan aimahin MNF tan malsawmna a ni zawk thei. An tlin hlim atang khan an boruak a suakpak chho ta zel a nih kha. MNF erawh rawn tlangval thar phet tumte a nam kiang zawkin a lan phah a, an Party inchinfel nan kawng a kuak phah ruak zawk mahna. Lo chak se zawng, kan hmuh tawh loh tura kan ngaih tam tak an rawn tlangval thar leh ngei ang!!
MI SALTIAH PARTY:
Mi saltiah, Bazar nu ho, inhlawh fa, Social Media a keini ang sakechek te zara ZPM hi lal an ni. Mahse an lal hnu kum 3 pawh tling lovah an lal mah mah tawh a, ban phak an ni tawh lo. Heng ho tan hian ban phak chu sawi loh phurrit an siam tam ta malh malh hle a, chhiah tih pun leh kawng hrang hrangah mi satliah tawrhna an thlen tam ta fu mai. Heng inbelhbawm khawm hian alawm tute emaw lalah siam a, tute emaw pawimawh tawh reng reng lova feh ve leh mai tur bawka thawn liam thin ni!!
KALPHUNG THAR CHU:
Lal duh luat avangin duh duh kha sawi lo pawh nise 2023 ah kha chuan an lal tho ang. Mahse anmahni thinglet leh thei tur duh duh sawi kha a tam ve bawk a, an duh vang ni miah lovin an thusawiin a thin let chang a tam ta hle. "MNF leh Congress pawhin an ti ve tho" tih hi ZPM Sorkar ah chhuanlam rintlak mipui tan a tling ve lo. "Keini chuan kan ti dawn, kan ti ve dawn lo" tih apui kha a tam lutuk a, kha zawk kha MNF leh Congress aia mipui TEHNA fet tak chu a ni zawk a ni.
Kalphung maksak tak tak kan hmu chho zur zut a, Party dang tih ve ngai lem loh ZPM duhkhawp lohna te chu ZPM Office ah a hruaitu lawk atangin a ri ring ta ber zawk a, Pathian thu hmangin kan in khawng fawk fawk a, a pawng lai kan in tuam dam si lo!!
SORKAR LEHNA:
ZPM tan hian a awlai tawh dawn lo. ZPM thli tleh nang fuh ve ngawr ngawr MLA te phei hi chu ngaihtuahawm tak an ni tawh thei. Thli tleh tum khan nang leh kei hi ZPM aiawhin ding ila, in veng pa tha satliah pawh kha ding se an tling tho ang tih tur a ni. Khati khawpa beiseina sang hmanga vawrh kha thli awm tawh lo karah chuan mi satliah tak an nihna an la inhmu ve rum rum mahna.
MNF leh Congress insiamthatna hian awmzia a nei tel fu thei bawk ang. Mipuiin MNF lam an hawi a, a ngai bawkin CM leh tuma a lo khik sung chuan Vote tla ahniam phah hle ta ve ang !! Chuti ni lova Opposition Party pahniha Change a thlen a, kumin kum tawp lam atanga tha thar, hruaitu ber a thar bawka ke an pen chuan a danglam nalh mahna.
MNF leh Congress hi chu insiam thara, insiam tha turin kawng harsa tak an zawh a rinawm loh a, ZPM hun tawn mek hi siam that theih mai nge zual zel tur, dam leh thei tawh mang lo tur, keh pup hmabak ni zawk ang tih hi rin thiam har tak a ni. An han in tih vel danah hi chuan zual lam a pan zel dawn a ang khawp mai.
HUIKHAWM THIAM POLITICIAN:
Lal viau tum lam ni lo, Party mite, a lu lam zawng zawng thlenga tih bik, thlei bik nei lova ZPM hmangaih vanga ho khawm thiam ZPM chuan an mamawh ber. MNF/Congress hruaitute hi chuan Mizoram bakah hian MNF/Congress hmangaih tel tlatna an thanlen pui thin a, chutiang taka ZPM hmangaihna thanlenpui ve ren rawn, ho khawm tum hruaitu hi ZPM hian an tlachham niin a lang.
Lo na deuh te, hliam tuar awmte tanpuia chhawmdawl aia in kuk zui tawlh tawlh an ching a nih chuan an kalsan tawh Aigupta theuh kha a ri ring tial tial zel ang!!
NO SIR:
Mak deuh chu Opposition nih lai hian mipui Level ah an awm thiam ber zel eng Sorkar pawh. Hei hi ZPM an danglam miah lohna a ni. An lal chiah a, a tha ber tur awm ang sawina te, mipui phun leh chiarna te, Sorkar duhkhawp lohna lang fo thin te hian a beng harh mang chuang lo. Chapo leh dengkhawng tak takin thu kha pui pui an phuhchhuak ta hlauh thin a, hetianga kal reng hi chuan Vote mamawh hunah in Adjust a harsa fo thin a nia !!
'No Sir' mipuiin an tih lawm lawm pawh Party Worker te sawi mam mai theiha ngaia awlsam taka hnungchhawn kan ching fo thin. Mipui, mi satliah, Vote ngah em em site hi DP&AR Officer te aw tlukin kan 'No Sir' na hi bengsika ngaihtuah a, nakin lawka 'No sir' mipuiin kut zungchal hmanga kan tih zui loh nan 'Yes sir' ti mi ringawt leh betlawn thiam ringawt te kuah beh i ching lovang u. Inthlan hun atan heng ho hi an HRISEL LO!!
TLIPNA:
Tunhnaiah mipui hriata "Kan Party kan inpumkhat" tih tum hnih lai sawi ngai ta ZPM hian heng hi engvanga sawi ngai nge tih mipui zawhna hi an Party chhungkaw insiamthatnaah a chhanna pek tum se la, Khiiitaaa awm tawh te, heeeetah rawn chhuk leh se la, an CM hma, an Minister hma kha ngaihtuah fo sela, tun hnu a khiiiii ti lam ringawta awm hmun an khuar tlat chuan nakin lawkah khuuuuuuta awm a awlsam teh a nia.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: