Sports Minister-in Grassroots Sports Development Programme zirchianna bu tlangzarh

Aizawl | July 9, 2026: Minister of State, Sports & Youth Services Lalnghinglova Hmar, chuan vawiin khan Mizoram State Sports Council leh Samagra Shiksha Mizoram in 'convergence' a an kalpui Grassroots Sports Development Programme zirchianna hrang hrang awmna report chu MINECO-a a office-ah a tlangzarh.

Lalnghinglova Hmar chuan, "Grassroots Sports Development Programme hi kan hmalakna phurawm ber zing ami a ni a, Mizoram State Sports Council leh Samagra Shiksha Mizoram te'n tha taka an kalpui niin hmasawnna tha tak a ni." a ti a "Zirna inah naupangten infiamna inzirtirna tha an dawng thei hi a tha in, a rah hi tun atanga kum ngaah chuan kan hmu tawh dawn a ni." a ti.

Sports Minister chuan sawi belhin, "He programme hi thui tak thlir chungin, state leh naupangte mamawh mila her rem a ni a. Zirna tibuai si lovin, infiamna lama hmasawnna tur kalpui a ni a, naupang talent haichhuahna leh tihhmasawnna kawnga hma lak a ni." a ti a. "GSDP report hian a fawmkim hle a, data kimchang tak tak kan neihte hi hmalam kan pan zelna turah a chhenfakawm dawn hle." a ti bawk.

GDSP hi Mizorama district 11 a Training Centre 46 ah kalpui a ni a. Sports discipline hrang hrang pakuaah naupang 1380 an inziaklut a ni. Heng zinga 34% chu hmeichhe naupang an ni nghe nghe. Report-ah hian GSDP kalpui dan bakah thuk zawka zirchianna kimchang tak 'Comprehensive Sports Analytics and Talent Assessment Report' a tel a. Naupangte bakah Training Centre leh sports discipline hrang hrangte dinhmun chu metric mumal tak hmanga zirchian a, score pek vek a ni.

Grassroots Sports Development Programme (GSDP) kalpui tur hian kum 2015 January 13 khan Mizoram State Sports Council (MSSC) leh Samagra Shiksha Mizoram (SSM) ten inremna an ziak a. Kum 2025-26 chhungin zirlai naupang kum 6 – 14 inkarte infiamna nihphung leh bulthut inzirtirna a ni a. Kar khatah nithum aia tlem lo training nei thinin sikul chawlhah uar zawkin kalpui a ni a, naupangten thla 6 chhungin minute 9,000 bawr vel training an nei nia ngaih a ni.

He hunah hian Samagra Shiksha Mizoram-a State Project Director C Lalthanzira pawhin thusawiin GSDP kum khatna tha taka kalpui a ni chu lawmawm a tih thu leh zawngchhangtlak tak nia a hriat thu a sawi a. Hmasawnna tha zawk awm tura sorkar department pahnih inkara thawhhona nuam leh tha tak a awm thei chu thil tha tak a nih thu a sawi bawk.

GSDP Programme Coordinator Hmingthansanga chuan GSDP report khaikhawmna pe in zirchianna kimchang tak an neih atangin naupangte zinga infiamna lama theihna a awmdan leh hmasawn zelna tura hmalak a tulnate chiang taka a lan thu a sawi a. Hei bakah hian coach-ten infiamna piah lamah naupangte chu an chennaahte tlawhin an nu leh pate nena inbiaknate an neihpui a, tin, nungchang leh hriselna lama zirtirnate an kalpui thin bawk.

GSDP Report tlangzarhna hun hi Mizoram State Sports Council Secretary Henry C Lalrawnkima'n a kaihruai a. He hunah hian GSDP Cell leh Samagra Shiksha Mizoram atanga mi pawimawhte an tel a ni.