Transport Minister-in MizoTaxi App a tlangzarh

Aizawl | July 1, 2026: Transport Minister Vanlalhlana chuan vawiin khan MizoTaxi App a tlangzarh. He hun hi Transport Department-a Directorate Conference Hall-ah hman a ni.

Minister chuan MizoTaxi application tlangzarhna programme a hmanpui thei chu lawmawm a tih thu sawiin he app hi Mizorama public transport tihchangtlunna kawnga rahbi thar pawimawh a ni dawn a ni, a ti a. India rama taxi aggregator service lian: Ola, Uber, Rapido-te awm mahse Mizote hman tura Mizopa siam ngei Mizoramin kan nei ve ta hi ropui a tih thu leh heng sumdawng lian zawkten hlawkna an um avanga rate to tak taka an siam ang ni lova awlsamna avang zawka mipuiin State Transport Authority (STA) rate ang thlapa an hmang thei tur hi a hlu a tih thu a sawi a. He app hian ram changkang zawkte ke pen ruala Mizoram pawhin hma a sawn ve theihzia tilang chiangtu a ni, tiin Pu Vanlalhlana chuan a sawi bawk.

Vanlalhlana chuan taxi khalhtute pawimawhzia sawiin driver mai an nilo a, Mizoram public transport ecosystem-a mi pawimawh leh Mizoram tana ambassardor-te an ni a. Khualzin, Lengpui airport atang emaw Sairang Station emaw atanga rawn lutte biak hmasak ber chu driver-te an ni, a ti a. Khawvel thang zelin a ken tel technology chu sawrkar inrelbawlna tha leh public service delivery tha zawk neih theihna hmanrua a nih avangin transport sector pawhin hma a sawn ve zel a ngaih thu a sawi a. Passenger-ten awlsamna an duh thu leh digital payment hi a tam zawk chuan an duh vek tawh thu sawiin, taxi driver-te pawhin passenger nghak leh zawnga hun tam tak an sen thin thu a sawi bawk a. He Mizotaxi application hian heng harsatnate hi a sukiang ve ve thei dawn a ni, a ti a. Mipuiin fair taka sawrkar rate approve ang thlapa an chuan theih a, driver-te pawhin fare chungchanga inhmuhthiam lohna awm thei an tawh lohna tur leh passenger tam zawk an hmuh theihna tur hmanrua a nih ngei a beisei thu sawiin hlawhtling taka he app hi hman a nih theih nan mipui leh driver-te thlawpna a ngen bawk a ni.

He hawnna programme-ah hian STA Secretary leh Transport Director ni bawk Er. R. Lalrammawia chuan he Mizotaxi app hi mi eizawnna nek chep tura duan a ni lova, mipuiten sawrkar rate dik tak hmanga awlsam zawka taxi an hman theihna tur kailawn a ni, a ti a. Platform fee atana 6% an lak chungchang chu sawi zauvin, a tlem berah cheng 5 leh a tam berah cheng 10 lak a nih dawn thu leh he fee hi Mizotaxi app inrelbawlna (self-sustenance) senso phuhrutu tura ruahman a nih thu sawiin sawrkar sum tuakna hmanrua a nih loh thu a sawi bawk.

Vawiin programme hi STA Chairman leh Transport Department Secretary ni bawk C Lalruaia chuan chairman niin a kaihruai a, National Institute of Technology (NIT) Asst Professor leh Digiride Technologies Pvt. Ltd Director ni bawk Dr Lalhruaizela chuan technical report pein powerpoint hmangin Mizotaxi app hman a entir a, Transport Department Additional Secretary R Lalchhanhima chuan lawmthu sawinain he hun hi a khar a ni.