"Mizoram Assembly-ah FCRA duh lohna Resolution pass ngei ni rawh se," ~ MPCC

Aizawl | July 28, 2026: Mizoram Pradesh Congress Committee (MPCC) Spokesperson Lalbiakzama chuan vawiin chhun dar 1 khan, Aizawl Press Club-ah thuthar thehdarhtute kawmin, ""Mizoram Assembly-ah FCRA duh lohna Resolution pass ngei ni rawh se," a ti.

Lalbiakzama chuan, "MPCC-te chuan Black Day kan hman ni a kan Sorkar hmalakna tura kan phut thil pathum - 'Mizoram Sorkar hian State Assembly Special Session ko in he Amendment Bill hi kan duh loh zia pass ngei se,', 'Mizoram Kohhran, Political Party leh NGO hruaitute hi kan CM zahawm tak hian a ho ngeiin Delhi-ah Central Sorkar hotute hmuh puiin he Amendment kan duh loh thu hi thlen ni rawh se,' tih leh, 'Kan MP pahnihte hian he Bill sawi ho a nih hunah Mizo mipui ten kan duh loh leh tha kan tih loh thu hi au chhuah pui ngei se la. Ban phar hunah pawh a duh lo lamah phar ngei turin kan phut tlat a ni,' tih te hi kan la dinpui reng," a ti.

Mizoram Pradesh Congress Committee chuan July 21 khan tun Parliament Monsoon Session-a FCRA Amendment Bill, Christian-te min tin zawnna ni ngeia lang, Central Sorkar-in pass a tum duh lohna lan tirin Black Day/Protest Day kan hmang a nih kha.

Kha khan Mizo mipui leh Kohhrante min kai harh ta deuh ni a kan hriat vangin a lawmawm kan ti hle. Chutih rualin kan Sorkar pawh a thang harh ve ta deuh nge kan CM zahawm takin Kohhran hruaitute a sawi pui ni awmin chanchin kan lo hria a, a lawmawm hle.

Mahse MPCC-te chuan Black Day kan hman ni a kan Sorkar hmalakna tura kan phut thil pathumte : Pakhatna : Mizoram Sorkar hian State Assembly Special Session ko in he Amendment Bill hi kan duh loh zia pass ngei se.

Pahnihna : Mizoram Kohhran, Political Party leh NGO hruaitute hi kan CM zahawm tak hian a ho ngeiin Delhi-ah Central Sorkar hotute hmuh puiin he Amendment kan duh loh thu hi thlen ni rawh se.

Pathumna : Kan MP pahnihte hian he Bill sawi ho a nih hunah Mizo mipui ten kan duh loh leh tha kan tih loh thu hi au chhuah pui ngei se la. Ban phar a hunah pawh a duh lo lamah phar ngei turin kan phut tlat a ni.

Tih te hi kan la din pui reng a, chuvangin Kohhran hotute hma theh a hmang mai lovin hma hruaia heng kan thil phutte ti hlawhtling tur hian Mizoram Sorkar leh kan CM hi kan ngen nawn leh a ni.

Tunah pawh Central Sorkar-in FCRA License nei te chhuanlam dawrawm te te hmanga a tih buai zia leh an tanpuina dawn tur a hrek sak dan hre chiangtu ber te chu kan kohhran hrang hrangte hi an ni, an tan erawh au chhuah pui a rem lo te pawh a ni ang e. BJP hruaitu zinga lang sar tak UP CM Yogi Adityanath ngei khuan NE-a helna tam nachhan chu Christian Missionary-te vang a ni a tih kha kan la hre reng em? Tuna an MP-ten FCRA atanga Christian-ten tanpuina an dawn hi mi Christian-a in let tura inthlem leh tih luih nan (Forced Conversion and Inducement) an hmang an tih vanga he Amendment hi rawn irh chhuak a nih hi a rinhleh awm ta loh.

India ram hmun dang ang bawkin Mizoram pawh BJP tui lianin min rawn chim zel a, FCAA hmangin kan ram leilungah thuneihna an inpe a, Development leh ther hlo dangte rawn tawk tarhin kan sihhnipna laiah min rawn tum chat chat zel e. Dan hrang hrang ti danglamin kan sakhua pawh min pal zut sak mek bawk.

Tun Session-ah tho hian Vande Mataram National Song humhimna tur Bill sawihoin an Pass dawn bawk. He hla hi tun hma pawn sak thin a ni a, mahse Mahatma Gandhi leh Congress hotute khan Hindu pathiannu te chawimawina chang chu telh loh nise an lo ti a. Tunah chuan Vande Mataram hi an pathiannute chawimawina nen National Anthem hmaah sak tur a ni dawn a, sak lai hian a thei chuan zawm a din vek tur tih thupek a rawn awm dawn a, thupek awih lo te hremna tur pawh siam a ni dawn bawk. Tunah pawh Sorkar Official Function-ah chuan an sak tir ta fo mai, mahse kan Naga unaute chuan sak chu sawi loh din pawh an ding duhlo ngam nia.

Ti chuan keini Development duh huam huamte hian kan rinna in a pawmpui loh, hmuhsitna leh thamlohna lam nilo in, an pathiannu Durga leh Laksmi te chawimawna sak puiin kan ding dawn nge Development leh Therhhlo min tiamte awh vang leh Strategic Importance-a kawngpui pasarih min puan saka Peace City din sak min tiam chuan kan dingin kan sak pui dial dial mai dawn? Mahni theuh inzawt ang u.

Tunlai India ramah Mahatma Gandhi, India Hnampa khawvel pawhin min ngaihsan pui chu thamlohna leh deuhsawhna vawrh darh mek a ni lai leh amah thattu Nathuram Godse leh a pawlte chawimawi leh sawi ropuina a zual em em laiin, tun CJP-te nawrhna atanga thil lo lang chu thangtharte hian Sakhuana avanga in huat leh intihbuai ai chuan Mahatma Gandhi zirtirna anga in dawh tawn leh in ngeih dial diala kan awm ho hian ram tan hmasawnna a thlen zawk dawn tih an rawn au pui a. Hei hian BJP-te innghahna LUNGPHUM rawn sawi nghingin an thla phang ru ve ta.

Khawvelin hruaitu chak leh pawi sak nei lo tak tak a lo hmu fo tawh mahse an lal reng bik lo. BJP leh RSS, India ram Hindu Lalram a din tum tlat tute pawh an lal reng dawn bik lo. Mahse kan rama tawrhna nasa zawk a thlen hma leh an thil tum dodal a DAN hnuaia mitin zalenna, intluk tlanna, sakhaw zalenna leh mipuite inrem leh inngeih dial dialna ram ni tura zirtirtu leh bei tlat tu, BJP-te hmaa thingthi ve ngailo tur chu INDIAN NATIONAL CONGRESS chauh hi a ni.

Chuvangin, MPCC chuan Mizoram mipuite harh chhuaka, kan Ram, kan Hnam leh Sakhua min chim pil sak tum mek tute hi DAN tlawhchhana kan la beih let theih lai hian min rawn au chhuah pui tur leh thawhpui atan kan sawm tak zet che u a ni.

PRESS STATEMENT

FCRA Amendment duh lohna Resolution Mizoram Legislative Assembly-ah pass ngei ni rawh se

Ni 21 July, 2026 khan Mizoram Pradesh Congress Committee chuan tun Parliament Monsoon Session-a FCRA Amendment Bill, Christian-te min tin zawnna ni ngeia lang, Central Sorkar-in pass a tum duh lohna lan tirin Black Day/Protest Day kan hmang a nih kha.

Pahnihna : Mizoram Kohhran, Political Party leh NGO hruaitute hi kan CM zahawm tak hian a ho ngeiin Delhi-ah Central Sorkar hotute hmuh puiin he Amendment kan duh loh thu hi thlen ni rawh se.

Tih te hi kan la din pui reng a, chuvangin Kohhran hotute hma theh a hmang mai lovin hma hruaia heng kan thil phutte ti hlawhtling tur hian Mizoram Sorkar leh kan CM hi kan ngen nawn leh a ni.