CM-in dik lo taka Family Pension la mekte ngaihhnathiamna hun hawn chhunga bansan turin ngen

Aizawl | July 15, 2026: Finance Department chuan vawiin khan dan dik lo va Family Pension laten an Pension Payment Order sorkara pe kir tura hmalakna bultanna Statewide Kick-off Programme on 'Sensitization of Voluntary Surrender of Pension Payment Order (PPO)', Assembly Annex Conference Hall-ah an buatsaih a. Chief Minister Lalduhoma, Finance Minister ni bawk chuan a hmanpui. Chief Minister hian Mizoram sorkar hnuaia document dik lo hmanga Family Pension la mek zawng zawngte chu ngaihhnathiamna hun hawn chhunga anmahni duh thu ngeia bansan (surrender) turin a ngen.

Chief Minister chuan, kan pensioner-te hi kan duhsak a, an pension benefit te, family pension te hi tha tak leh tluang takin la se kan duh. Pension first formulation pawh kan chingfel hnem tawh a ni. Pension tihfel mai thei loh tam takte hi an thawhna office lama an pension file khawihtuten training an neih that tawk loh vang a ni fo tih kan hriat avangin chung mite zirtirtu tur Training Wing siam tumin hma kan la mek a, an vanglai hun zawng zawng sorkar tana hmang raltute hi kan zah a ni.

Hetianga kan pensioner-te kan duhsak em em lai hian Family Pension hi mi eng emaw zatin dik lo takin an la nia hriat a ni a. A then hi chuan tum reng vangin document lem hmangin an la nia an lan laiin mi tam tak hi chuan an hriat loh vangin an lo la an ni thei bawk a. Hetianga dik lo taka sorkar sum luan raltirna hi tihtawp kan tum a ni.

A bultan nan mahni duhthu ngeia PPO pekkirna hun, thla thum chhung kan hawng mek a, document dik lo, dawt behchhana family pension laten anmahni duh thu ngeiin bansan (surrender) se kan duh a. He hun hawn chhunga pe kirte chu an sum lo lak tawhte kan chhuh dawn lo va, kan ngaidam dawn a ni.

Ngaihhnathiamna hun a ral hunah kan Task Force ten pension latute zawng zawng hi kal chilhin, a hmuna endikna an nei leh dawn a. Dik lo taka pension la an hmuhchhuahte chu kan tihtawpsak bakah hremna pek kan tum a ni.

Miin dik lo taka Family Pension a lak theihna bul hi document lem a ni thin a. Document issue tute hi an pawimawh hle. Birth Certificate/Marriage/Divorce/Non-Marriage/Life Certificate/Income Certificate/Ration Card leh Pension lakna atana document-te chu an rinhlelhawm nia kan hriat chuan kan chhui zui zel tawh dawn a. Document issue tute hi lo fimkhur se kan duh a. A tul a nih chuan document issue tute pawh hi kan umzui zel dawn a ni.

Family Pension la tura mi kan duhsakna lamah dan ang takin a qualify em tih kan chhut thleng lo palh ang tih a hlauhawm a. Chuvangin, tunhma lama la tih ngai reng reng loh, Family Pension la thei tura tling leh tling lote mipui vantlang hnena ram pum huapa inhrilhfiahna, Sensitisation Programme kan duang chhuak a, vawiinah a bul kan tan ta a ni, a ti.

Khualzahawm Adviser to CM (Finance & Planning) TBC Lalvenchhunga pawhin thusawiin, pension payment hi kan Revenue Expenditure lian ber a ni tawh a. Dan ang taka miin a lak chuan kan lawmpui a, kan duhsak a, dawt leh document dik lo behchhana sorkar sum dik lo taka latute erawh hi chu en liam mai chi a ni lo a ni, a ti.

Tunah hian Mizoram sorkar hnuaiah pension benefit dawngtu hi mi 39,954 an awm mek a, heng zingah hian superannuation pension la mek 22,139 leh Family pension la mek mi 11,194 an awm a. Pension chi dang latu Centralised Pension Processing Centre (CPPC) kal tlanga la 5629, Voluntary 594, VRS 289, Invalid 69 leh Compulsory mi 40 te an awm a ni.

Sorkar chuan dik lo taka Family Pension latute tan mahni duhthu ngeia sorkara pekkir (surrender) na hun July ni 1 atanga September ni 30 chhung a hawng mek a, mi thenkhat chuan an PPO te an pe kir tawh nia sawi a ni. He mi hun chhunga pe kir lote dapchhuah hna hi thawh chhunzawm a ni ang a, document lem hmanga hetiang thil tih tumna hi a awm zui zel loh nan zau taka awareness kalpui a ni bawk ang.

Kick-off Programme hi Finance Department Secretary Ramchuana chuan a kaihruai a, Commissioner & Secretary Finance Vanlaldina Fanai chuan kalkhawmte lawmna thu sawiin Finance Addl. Secretary Jennifer HL Duhawmi, chuan report a pe a. Chief Controller of Account Vanlalsawma, chuan lawmthu sawiin a hawnna inkhawm hi a titawp a ni.

A hawnna inkhawm buatsaih zawhah hian Aizawl district chhunga khawtlang hruaitu, NGOs aiawh leh kohhran hruaitute nen hian he mi chungchang zirhona (technical session) hi an nei zui a, district hrang hrangah pawh neihzui zel tur a ni ang.