Central YMA -in SIR 2026 draft roll-a mihring pun nasat lutukna hmunte en tha leh turin ECI ah thlen dawn

Aizawl | July 14, 2026: Central YMA chuan Special Intensive Revision (SIR) 2026 draft roll-a mihring pun nasat lutukna hmunte en tha leh turin ECI ah kalchilhin an thlen dawn.

Central YMA chuan Special Intensive Revision (SIR) 2026 draft roll-a mihring pun nasat lutukna hmunte en tha leh turin thuneitute an ngen dawn a; ECI lam pawh kalchilhin an thlen dawn.

Vawiin khan Central YMA chuan an Committee Room-ah thuthar thehdarhtute an kawm a; Central YMA hruaitute chuan SIR 2026 Draft Electoral Roll tihchhuah kha ngun takin an zir chiang a, Constituency thenkhatah SIR neih hnuhnung ber kum 2005-a Roll-a awmzat leh mihring pun dan nena chhutin Enumeration Form thunluh (Digitisation) ah hian thil ni thei lo a awm nia an hriat thu leh, Mapping chungchangah hian dik hlel deuha thil tih a awm nia an hriat thu an sawi a, hemi chungchang hi thuneitute hnenah en tha leh tura ngenna thlen an tum thu an sawi.

Central YMA president Pu R Lalngheta chuan, SIR 2026 draft roll atanga a lan danin khawthlang lam ramri hnaih constituency-ah mihring an pung nasa lutuk chu an ngaih a that loh thu sawiin, entha leh tura thuneitute ngen an tum thu leh ECI ah pawh lamkal intirin a hmunah an zuk kalchilh dawn thu a sawi a; voter pun tam zualna hmuna SIR buaipuitu zingah thawk tha tawk lo an awm nia an hriat thu a sawi bawk.

Central YMA hruaitute chuan roll a la awm ngailote tana inthun luh dilna hun hawn mekah leh hearing neih hunah pawh khua leh tui dik takte chauh an luh theih nan hearing kal pui turin ERO leh AERO te an ngen a; hearing ah hian YMA Branch-te leh NGO dangte pawh thahnemngai taka tel turin an ngen bakah, Political Party-te pawh ngaihtuahna dang hmang lo turin an ngen nghal a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]