Pro Volleyball | Sihphir-in 3 - 2 in Tuichangral an hneh

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 7 : June 04, 2026 : Ningani Zan

Sihphir def Tuichangral (mipa)

= 23-25, 18-25, 25-17, 25-23, 15-8 (3-2)

* Set hmasa pahnih an hloh hnuah Sihphir kir lehin Tuichangral beiseina an titawp a, ningani zanah tha takin Mizoram Rural Bank Pro Volleyball League an thlah liam.

* Tla chiang sa tawh Sihphirin an zahawmna humhimin nungchang ropui tak an lantir a, set hloh belha tlawm thei dinhmun atangin Niyas Abdul Salam chuan team a fuih phur a, phu takin set thum an la zawn. An inkhel en ve ngei tum an club assistant secretary Vanhmingliana'n ningani tlai dar 5:50-ah chatuan ram a pan thut a, a tan hnehna an hlan.

* Set thum faiin Tuichangral chak se semifinal an beiseina a la nung zui thei a, mahse, mar tluan zo lovin set thumna atangin an zuih ral a, a hniam ber dawttu ni chungin championship an khar. League vawi ruk an khelhah tum thum Sihphir an chak a, Tuichangralin vawi hnih hnehna changin point sarih ve ve an hmuh bakah an set lak leh hloh a inang chiah a, chak tam zawk Sihphir sang zawkin nikum ang bawkin semifinal lut pha lo zinga sang ber ni chungin an tla a ni.

* Sihphir an chak rualin semifinal lut an chiang kim a, Hunthar, Khawbel leh Anastasia Electric Veng zuiin a sang pali zingah Chhinga Veng Spikers an tel ve nghal. Inrinni zanah Chhinga Vengin pahnihna nih tumin table-a sang ber ni chiang sa tawh Hunthar an hmachhawn dawn a, league zawh fel a ni ang.

* Kerala spiker Niyas chuan a zawnin point 40 a hmu a, Pro Volleyball player zinga hmuhnawm ber pawl ni mah se season liam ta ang bawkin Sihphir a tlangpui zo lo va, a vawi thum nan Kuriz Player of the Match ni chungin a hun hnuhnung a hmang. Khawbel hmaah Niyas hian point 40 hmuin vawi 10 a tisual a, mi malin che tha mah se an chak zo lo va, Tuichangral lakah point 40 hlawh chhuak lehin 11 a hloh a ni.

* Lehlam vuak dangtu Vanlalawmpuia'n a ball hmuh vaw tla bawkin point 12 a hmu a, point sarih hloh tel mah se tum dang zawng aiin a khel tha a; Lalramhluna'n vawi riat vaw tlain point ruk a paih a, a tla hniam ve thung. A tir lamah ho taka point an hloh thin an tuar a, setter F Lalhmingmawia'n inrintawkna nen a khelh atangin team pum puiin hma an sawn a, tlak fual nei lovin set thumna atangin an intel ruh tluan a ni.

* Tuichangralin Sihphir an hmachhawn hmain Chhinga Veng lakah harsatna lian tak an tawk a, set khatnaah 21-19-a sang zawk an nih lain Sri Lanka atanga an lak luh Mahela Indeewar chuan a ke a tina a, a khelh zui theih loh hnuah set thum faiin an tlawm. A hliam en chian a nih hnuah inkhelhpui mai chi a nih loh avangin Mahela a haw a, Rajneesh Singh chuan a hmun ruak luahin Sihphir hmaah vawi 27 vaw tlain tum kua a tisual a, Saidingpuia Sailo chuan point 15 hmuin point sarih a hloh a, Lalropeka, Lalrinpuia leh Joseph Zairemtluanga'n point ruk vek hlawh chhuak mah se team an chakpui zo lo.

* Set khatnaah ball an invuak siak nasa a, Niyas leh Rajneesh an inel tawk hle a, Mizo player-ten chiang leh na tak takin an hlap tla bawk. Lalneihpuia Hrahsel chuan vaw tlain 23-22-in Sihphir an sang hman a, mahse, anmahni tihsual avangin Tuichangral tan kawng an hawnsak zui. Setter Hmingmawia leh Ramhluna'n an nam sual zawn a, a hnuah Hmingmawia'n ball a vawrh chhiat avangin lehlam spiker Saitea'n a vuak tlak theih phah a, Tuichangralin point thum hmu zawnin set an la.

* Phurna leh inrintawkna nen Tuichangralin nawr zuiin set hnihna tir lam atangin an kalsan a, Uttar Pradesh atanga an lak luh Rajneesh chuan na taka a hlap tlak hnuah Rinpuia'n lehlam rinrawl Niyas-a vuak a dang a, 14-9-in an sang. Sihphirin setter thlakin captain Mesak Malsawmkima luhtir mah se thil awm dan a danglam lo va, Saitea'n a vuak tlak hnuah Rajneesh chuan a hnung atangin a hlap tla a, 21-14-a hma an hruai hnuah harsa lovin set an la zawn.

* Set thum hloh zawn thei mai tura ngaih an nih hnuah Sihphirin mualpho taka tlawm an duh lo tih chiang takin an lantir. Set thumna an tan rualin an insiam rem thar leh a, setter pangngai Hmingmawia'n a hma aiin ball a vawrh tha a, taima leh zualin lehlam vuak dan tumin an zuang a, awmzia a nei.

* Niyas chuan a hma aia rin tlakin a vua a, team chawi kangin Awpa'n a hlap tlak zawn hnuah Kerela spiker-in chhunzawmin a vaw tla zawn ve leh a, Tuichangral rinrawl Rajneesh chuan hlap tlak a harsat ve thung. Sihphir tan Albert Zothankhuma'n point a hmuh rualin 13-9-in an sang a, inkhel boruak inthlak hlawkin Tuichangralin an nawr let thei lo a, Niyas-a'n a hlap tlak hnuah Rajneesh chuan vaw kai lovin 22-14-in an inthlau.

* Awlsam taka set thumna an lak hnuah Sihphirin inrintawkna nen an khel zui zel a, set linaah hmahruaitu ni chho char charin Niyas chuan Rajneesh-a vuak a dansak hnuah Saitea'n a hlap kai lo a, 22-18-in hma an hruai. A hnuah Albert-a'n rang taka a vuak tlak rualin 24-21-in an sang zui leh a, point khat neih belha tlang mai tur a nih laiin Tuichangralin vawi hnih dang mah se Lalneihpuia Hrahsel chuan set an lak zawnna point a hlawh chhuak a ni.

* Sihphirin chak duhna an nei nasa tih set hnuhnung berah an lantir chhunzawm a, an phur tulh tulh. An beisei anga an chak tlang mai loh avangin Tuichangral boruak a tla hniam a, set hnih an hloh hnuah awmze nei thamin an khing phak tawh lo. Niyas chuan vaw tla zawn nghalin nuam ti takin Sihphirin inkhel an thunun a, Tuichangralin point riat chiah an hmu ve hman tihin an tlang a, hlim takin hun tawp an hmang thei.

* An khelh hmasak berah vawi hnih set hloh hmasa zawk ni chungin Sihphirin Chhinga Veng an hneh tawh a, set nga an khelh vawi hnihnaah set hnih hloh hmasa chungin Tuichangral an hneh leh. Hmeichhe zinga Pro Volleyball mipa team enkawl hmasa ber Lalhmingliani Sailo hovin an beisei knockout round thleng pha lo mah se vawi ruk an khelh tum thum an chak a ni.

Kuriz Player of the Match

- Niyas Abdul Salam (Sihphir)

Cheetak Fan of the Night

- Elen Lalramsangi (Sihphir)

MVA Lucky Fan

- Alpha Zodingliana (Tuichangral), Lalhmangaihzuali (Bawngkawn)

SIHPHIR

Niyas Abdul Salam : Point Hmuh - 40, Point Hloh - 11

Vanlalawmpuia : Point Hmuh - 12, Point Hloh - 7

Lalramhluna : Point Hmuh - 8, Point Hloh - 6

Albert Zothankhuma : Point Hmuh - 6, Point Hloh - 4

Lalneihpuia Hrahsel : Point Hmuh - 7, Point Hloh - 8