MNF President leh National Security Advisor inkawm

Aizawl | June 5, 2026: MNF President Pu Zoramthanga leh National Security Advisor Pu Ajit Doval te chu. June ni 2, 2026 tlai dar 5:30 khan chu NSA Office, PMO, South Block, Raisina Hill, New Delhi-ah an inkawm a. Thil pawimawh tam tak, a bikin Burma leh Bangladesh chungchanga thil pawimawhte khunkhan takin an sawidun. He inkawmnaah hian Er K. Lalsawmvela, MNF General Secretary pawh a tel a ni.

MNF President leh National Security Advisor te inkawmnaah hian tun hmaa Pu Ajit Doval-a leh Pu Zoramthanga te'n Burma-in remna an neihna tura hma an lo lak tawhna, Burma Sorkar leh underground hruaitute bakah India Sorkar ngei pawhin beisei taka a lo thlir chungchang pawh an sawi dun leh a. An hmachhawp leh hmalakna puitlin lek lek tawh, Burma-ah inthlanna a awm tak avang leh Aung San Suu Kyi kaihhruai sorkarin a ngaihsak tak loh avanga lo thamral chho zui ta chu pawi an tihzia leh an uizia an sawi a. He harsatna hi thlenglo se la chuan Burma ramah remna a awm tawh ngei an rin thu te, hemi atan hian engtia tih zel tur nge tih thlengin thui tak an sawidun a. Mizoram lam chungchang leh India ram chhung chungchang an sawi dun bawk.

Pu Zoramthanga leh Pu Ajit Doval te hi tun hma aṭanga ṭhian inkawmngeih sa tak an nih avangin Pu Zoramthanga hian a lehkbabu ziak 'From Guerrilla Fighter to Chief Minister' chu a pe a. Pu Doval-a chuan a thlalak chuanna leh a chanchin inphum telna lehkhabu chu chhiar a chak tawh thu lo hrilhin, lehkhabu ziah a tum mek thu leh Pu Zoramthanga chanchin ziah tel a tum thu a sawi ve bawk a ni.

He inkawmna hian darkar chanve chuang zet a awh a. Inkawmna hun ṭha tak leh hun hlimawm tak an hmang ho.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]