“Mizoram-in dan leh hrai thlahdulna hmanga dan siamṭhatna kalpuiin Zoram Mipuite tan Sumdawnna kawng tiawlsam turin hma a la”
PRESS NOTE
Subj: “Mizoram-in dan leh hrai thlahdulna hmanga dan siamṭhatna kalpuiin Zoram Mipuite tan Sumdawnna kawng tiawlsam turin hma a la”
24th July, 2026: Vawiin khan Chief Minister Pu Lalduhoma chuan CMO-ah chanchinbumite kawmin, Mizoram Sawrkarin sumdawnna kawng hrang hrang tihawlsamna tura hmalakna 'Compliance Reduction & Deregulation Reforms Programme' kalpui mêk chungchang a hrilhfiah a. Chief Minister chuan he hmalakna hi Mizoram economy thang chho zêl tûr leh mipuite tâna hna siambelhna kawnga lungthu pawimawh tak a nih tur thu a sawi a, hmalka tawhdan te a hnuai mi ang hian a tarlang a ni.
Mizoram Sawrkar chuan India Sawrkar laipui hmalakna zinga pakhat, Compliance Reduction and Deregulation Reforms Programme hnuaia dân leh hrai ṭûl lo leh rit lutukte tihtlêm a, kalphung tihawlsam te, inrintawnna thupuia hmang chunga rorelna kalpui te, leh sumdawnna lama hmasawnna leh investment, entrepreneurship leh economic growth tana environment ṭha siam tumna chu nasa takin a kalpui mêk a.
Commerce, Industries, Geology & Mining Department chu Nodal Department niin, anni hian Mizoram sawrkar hnuaia department leh agency hrang hrangte he hmalaknain a huamte enzuiin an kaihruai a ni.
Deregulation Phase-I (February–December 2025) hnuaiah hian, State sawrkar chuan dân leh hrai zawm ngai tihawlsam te, sumdawnna kawng hrang hrang a phalna lak dân tihmumal te, digital governance tihchak te leh mipui hnena rawngbawlna tihhmasawnte ngaihpawimawh hmasakah neiin siamṭhatna hrang hrang a kalpui a. Hêng thawhrimnate avâng hian, Government of India hnuaia Department for Promotion of Industry and Internal Trade (DPIIT)-in ram pum huapa endikna a neihah Mizoram chu India ram State-te zingah 12-na a ni.
Phase-I chhunga hmasawnna pawimawh tak tak kalpui te chu ram hman phalna (land-use approvals) tihchangtlun (digitization), India Industrial Land Bank nena thlunzawm GIS hmanga Industry ram mapping siam te, in sak dân inkaihhruaina thlahdul te, hnathawktute dân (labour law) siamṭhatna te, MSME-te tana hmun hma leh chhehvel phalna (environmental clearances) lak dân tihawlsamna te, nitin mamawh hrang hrang (utility services) online-a pek chhuahna te, Jan Vishwas ang chi siamṭhatna te, leh State service-te National Single Window System (NSWS) nena thlunzawmna te an ni. Hêng hmalaknate hian thil kalpui dân tlang leh felfai zâwk, rang zâwk, leh sumdawnna atana remchang zâwk dinhmun siam nan nasa takin min pui dâwn a ni.
Hemi hlawhtlinnate bawhzui hian, sawrkar laipui chuan January 2026 khan Deregulation Reforms Phase-II a tlangzarh leh a.
Phase-II hnuaiah hi chuan State-a dân leh hrai hman mêkte uluk taka thlirletna leh tihhmasawnna lam a thupui ber a ni. Tin, he phase hnuaia ngaihpawimawh bîk (Priority Areas) 23 Mizoram tana thlan chhuah zinga hmalakna panga te chu India sorkarin a pawm tawh a, Priority Areas hmabak dang te pawh tilawhtling tûrin chak taka kalpui mêk a ni bawk.
Phase-II hnuaia hmalaknain a huamte:
Ram hman dân leh industry hmasawnna.
In sak leh hmunhma siam phalna.
Utility service leh business permission.
Kawlphetha lama hmasawnna.
Environment enkawlna.
Tourism lama hmasawnna.
Zirna lam siamṭhatna.
Hriselna (Healthcare) lama inkaihhruaina.
Sawrkar inrelbawlna leh dân siamṭhatna kawng hrang hrang.
Hêng hmalakna hrang hrangte hian State chhunga sumdawnna din leh kalpui nana senso leh hun hman ṭhin nasa takin a tihniam dâwn mai bakah kalphung harsa leh hnawk te a tiziaawm dâwn a. Chumi rahchhuah chu mahni kea din tumna a chawisang ang a, mimal sumdawnna a hip ang a, mipui tân hnathawh tûr a siambelh bakah, Mizoram economy thang chho zêl tûrah nasa takin a pui dâwn a ni.
Chief Minister chuan, Deregulation hnuaia hmalakna dân siamṭhatna (reform) kawnga department hrang hrang hotute, officer-te, leh he hnaa inhnamhnawih zawng zawngte thawhrimna chu a fak a. Hmalakna tûr la awmte hun tiam chhunga zo ngei tura fuihin, Mizoram chu Phase-I aia dinhmun sâng zâwk a inhlangkai thei ngei tûra ṭan la tûrin a chah bawk a.
Tin, ram economy ṭhan chhoh zêlna tûr te, mipuite tana hna siambelhna kawngah te, leh mipui tana rawngbawlna ṭha zâwk siamtu tûr—langtlang tak leh chak taka sumdawngte tana remchang, leh mipui tana awlsam inkaihhruaina felfei tak siam tumin a thawk reng dâwn a ni tih a sawi uar hle bawk a ni.
Chief Minister hi Chief Secretary leh Department kaihhnawih Secretary ten an tawimawm a ni.
Sd/- Secretary, C&I, G&M
Post a Comment
He post chungchanga i ngaihdan lo sawi ve rawh: