CYMA leh damdawi zuarte'n Dak In kaltlanga Khuh Damdawi chah luh tam lutuk leh ruihhlo do kawnga thawhho dan tur sawiho

Aizawl | June 4, 2026: Central YMA hruaitute leh Damdawi Dawr neitute, Mizoram Chemist and Druggist Association (MCDA) hruaitute chu vawiin tlai khan Central YMA Office-ah an inkawm a, Dak In kaltlanga Khuh Damdawi chah luh tam lutuk chungchang leh ruihhlo do kawnga thawhho dan tur an sawiho a. Inkawmhona hi Central YMA President R Lalngheta'n a kaihruai.

Inkawmhonaah hian tunhnaia Dak In kaltlanga Khuh Damdawi chah luh tam lutuk chungchang leh ruihhlo do kawnga thawhho chungchangte sawiho a ni a. Tunhnaiah thalaiten ruihnana an hman khuh damdawi chi hrang hrang Dak In kal tlangin Dawr neitu thenkhat ten thahnem tak tum engemaw zat chah luh thin a ni a, hemi chungchangah hian Damdawi dawr neitu Association hruaitute chuan Central YMA te nen theihtawp chhuaha en zui nise an ti a. Hemi bakah hian ruihhlo do kawngah thawhho zel dan tur te an sawiho bawk.

Vawiinah vek hian 34 Assam Rifles hotu, Col. Laldinpuia leh hotu dang ten Central YMA tlawhin CYMA hruaitute nen an inkawm a. Ruihhlo Do chungchanga hmalakho dan tur leh Mizorama ruihhlo dinhmun te an sawiho.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]