“Zonunmawi a tlakhniam zel lai hian YMA kalphung erawh a danglam ve lo”

Aizawl | May 30, 2026: Pangzawl Group YMA chuan vawiin khan an huamchhunga YMA Branch hrang hrang hruaitute pualin infuihtharna leh rikrum thila nunna chhan dan (Basic Life Support Training) inzirtirna hun Pangzawl Khuanghlum Community Hall ah an hmang a. Pangzawl Group YMA President K Vanlalthanga'n a kaihruai a, Central YMA General Secretary Prof Malsawmliana'n a hman pui.

He hunah hian Central YMA General Secretary Prof Malsawmliana chuan thusawiin, ‘khawvel danglam zelah Zonunmawi te a bo hret hret a, chhiatni a kan intawiawmna te pawh a tlahniam chho zel a. Hetiang a nih mek lai hian YMA kalphung leh zia erawh a danglam lova, kum 90 a tlin chhoh hnuah pawh a zepui hi a la pu reng a ni. YMA hi Mizo te min phuarkhawmtu pawl lian ber a nih avangin a mawhphurhna pawh a lian a, hruaitute ko pawh a rit reng a ni. Chutiang anih avang chuan YMA hruaitu chu ze nghet leh Mizo hnam thatna tur ngaihtuah mi a ni tur a ni. YMA hriatpuina lehkha hi sawrkara lehkha pawimawh lakchhuahnan a ngaih thin avangin pek chhuah kawngah fimkhur a ngai a, YMA Ziaktute kutah hian hnam him leh him loh thui tak a innghahna chin a awm” tiin a sawi a. ‘YMA hruaitute tih awm tak leh tih loh awm tak te thliar thiam turin’ YMA hruaitute a chah.

Chawhnu lamah Tv B. Zoremmuana, Group Secretary in a kaihruai a, Central YMA atangin Dr PC Lalramenga, Senior Specialist, Aizawl Civil Hospital (& Member, Health & Sanitation Committee, Central YMA) rikrum thila mihring nun chhan dan (life saving ) zirtirna a pe bawk.

Pangzawl Group YMA huamchhungah hian Branch 8 an awm.