World No Tobacco Day 2026 hmang

Aizawl | May 29, 2026: Kumin World No Tobacco Day 31st May hi Chawlhni (Sunday) a a tlak avangin Mizoram lamah chuan 29th May 2026 (Zirtawpni) khan hman a ni. World No Tobacco Day ah hian World Health Organization (WHO) theme thlan bik hmangin kum tin hman thin a ni a, kumin a tana theme thlan chu “Unmasking the appeal – countering nicotine and tobacco addiction” tih a ni. He hun hi National Tobacco Control Programme Mizoram te buatsaihin District hrang hrangah hman a ni.

World No Tobacco Day hi Aizawl-ah chuan DHME Auditorium ah hman a ni a, he hun hi Dr R Lalchhuanawma, Mission Director, National Health Mission, Mizoram kaihhruaina hnuaiah hman a ni. Mission Director chuan Day Observe a nih chu thil tha leh tangkai tak a nih thu sawiin kalkhawmte hnenah lawmthu a sawi a. Thawktu te chu Health care providers (Doctor, nurse, HW etc) kan nih angin mahni fihlim thei ila, Health facility te 100% tobacco Free ni zel thei se, Home visit etc kan neih thin na ah te zirtirna pe uar zel ila, Generation thar (Tobacco Free) kan neih theihna turin tan lak a pawimawh a ti.

R Lalremruata, State Consultant, NTCP chuan WNTD theme hmangin presentation a pe a, Health Dept-a thawktu te, Teachers, Dan kengkawhtu te leh Ngo pawl hrang hrangah Zuk leh hmuam that loh zia inzirtirna training vawi 107 buatsaih tawh niin Awareness Programme School leh Insitution hrang hrangah vawi 204 nei tawh a ni a, meizuk phallohna hmuna meizu mi 7580 man an nih thaw thu a sawi a. E-Cigarette (Vape) chi hrang hrang leh hriselna atana a that loh zia a sawi bawk.

ISTHM President VL Vela'n thu a sawi bawk. Special item hi Aizawl College of Nursing leh Blessino Nursing School ten an nei bawk a, hun khar nan Dr. Zoramthangi Renthlei, State Nodal Officer, NTCP chuan pledge (vaihlo zuk leh hmuam dona lam) leh lawmthu sawina a nei a ni.

WHO tarlan danin tobacco industry lam hian thangthar ten vaihlo zuk leh hmuam an hman nachang an hriat theih nan chin dan thar tam tak a rawn chhawp chhuak thin a, hemi laka kan thangtharte kan venhim hi a pawimawh an ti tak zet a ni. Kum engemawti atang khan khawvel in vaihlo zuk leh hmuam thatlohna a hria a a buaipui chhoh atangin vaihlo zuk leh hmuam siamchhuaktute hian thangthar zawk te hip nan leh tihchhin an chak nan a tuamna thlengin mit la thei tur te in an buatsaih ta a, hemi bakah hian flavor hrang hrangte a siam a ching chho ta a, hei hian kan thangthar te a hip thei a nu leh pa ten kan fate hemi laka fihlim tur a kan hrilh ngun a pawimawh tak zet a ni, entirnan kan ramah chuan mouth freshner an tia Shikhar ei ching kan thalai te zingah an tam hle a ni, Shikhar hian bawm hran pawlh tur a chhawm a hei hi vaihlo a ni a, a pawlh tello hi chuan an ei tha peih hlawm meuh bik lo. Vaihlo ah hian nicotine a tel avang hian ngaih (addict) a awlsam em em mai a, hman tawh chuan bansan leh mai a har em em a, hemi a nih avang hian tihchhin loh hi a him ber a ni. Tunlai khawvel ah meizuk bansan nan tiin Electronic Cigarette (E-Cigarette)/Vapes te an rawn siamchhuak a he thil ah hian nicotine tello ti ten flavor hrang hrang ten an rawn siamchhuak a, he thil hi a tha lovin thangtharte zuk leh hmuam hman tanna kailawn a ni thei a ni. Kan ram ngei ah pawh hmang kan tam ta em em mai a, heng E-cigarette / Vapes te hi Prohibition of Electronic Cigarette Act 2019 hnuaiah India ram pumah zawrh chhuah, sem darh, lakluh etc. khap tlat a ni a, lo zuar ru an awm chuan dan bawhchhia an ni a hrem theih an ni tih kan hriat tlan pawh a pawimawh tak zet a ni. Vaihlo zuk leh hmuam te hi eng ang pawh a tuam mawi pawh nise hriselna a tan a tha lo tih kan hriat a tha hle mai.