Storm Drain - Aizawl chhantu tur chu!

- Lalnunṭawma Fanai

Furpui ngam lo chhan ngai Aizawl khawpui tana UD&PA department hmalaknaa tui luan kawr Storm Drain siam zinga hmun 12, vaibelchhe 44.25 man thawh mek kan tlawh kual a, sorkar hmalakna zinga thil ṭha hmu kan ni a, min tihlim hle. Storm Drain hi Aizawlah hmun 26-ah siam mek a ni a, kan tlawh hi a chanve pawh tling lo tihna a ni. Sorkar apiang hian hmasawnna hna hi an kalpui zel dawn a, chutah chuan sum an hman dan leh an hnathawh dan hi kan teh ang a, mipui lungawi dan kha a pawimawh lai ber a ni zel dawn. Hmasawnna hmel thar hmuh duh mipuite tan ennawm ṭangkai a ni dawn tih a chiang a, a hautak a, hun leh tha a mamawh ve deuh thung. Aizawl himna tur a nih avângin phurna sosang ru angreng deuhin min ṭhâm a, Sakei zan vâk ang maiin kan tei kual vat vat a, thlan tui a ko chhuak a, kan hah hlepah kan chhiar a ni ber.

He chhanchhuahna project lo irh chhuak hi, awmze neia sorkar sum hmanna a nih avângin thlawpna bân phar an tam hlein ka hria. Aizawl khawpui chhung hmun 26 atan vaibelchhe 61.76 ruahman a ni a, km 8.13 a thui a ni. District headquarters-ah pawh siam mek a ni a, Khawzawl District bikah chuan Khawhaiah hmalak tel a ni. SASCI part V 2024-2025 sum, phase-I aṭanga hmalak a ni a, ram puma sen tur zawng zawng hi vaibelchhe 104.26 a ni a, a vaiin km 20.17 a thui a ni a, hmun 121-ah hmalak a ni. SASCI sum aṭang thoin Phase II pawh la kalpui leh tur a ni a, ruahmanna pawh a awm mek. Aizawl ni lo district dang 10 a hmun 95-ah hmalak a ni bawk a, vaibelchhe 42 senna tur niin, a vaia a sei zawng hi km 12 a ni.

He Storm Drain Project hi UD&PA department changtu Minister Pu K Sapdanga’n a ngaihtuah chhuah a ni an ti a, hetiang ngaihtuah chhuahna leh awmze neia SASCI sum a hlawma hman a ni hi a chhawrtu tur mipuiin ṭha an ti a, ṭha lo han ti kual vel pawh hi an awm pawhin ka hre rih lo. Sorkarin hna a uluk a, contractor zingah sorkar lai party mi leh sate pawh an awm a, contractor ni sate pawh an awm. Hnathawh vil tur hian, project design tu ARDECO Design Build rawih an ni a, he consultancy firm hnuaia engineer eng emaw zâtin contractor te hnathawh hi an vil ṭhin a, hmanraw ṭha lo chu a tharin an thlaktir ṭhin.

Tuikual lui kan en a, engineer ten min lo dawngsawng a, he project hi ‘Storm Drain at Tuikual Lui (with motorable Covering) tih a ni a, vaibelchhe 10.8 ruahman a ni a. Aizawl West Outlet Project nena kalkawp a ni a, lui chungah motor kal theihna siam a ni dawn a, a sirah mihring kal theihna siam tur a ni a, vaibelchhe 20 ruahman a ni bawk. March ni 24, 2026 khan kan tlawh a, JCB in a lo lai vut vut a, a hma ni chiah aṭangin hna an lo thawk ṭan chiah nghe nghe. Tuikual lui aṭangin Private hospital lian leh lar, pantu ngah; mipuiin MUHCS nen inzawm ve hram tawh se an tih huai huai Ebenezer Hospital a pawh thla dawn a ni. Rikrum thilah a ṭangkai dawn a, ṭhalai leh insawizawi duh nu leh pate tan vahvelna nuam tak a nih dawn avangin a chhawrtu hnaivaite tan nghahhlelhawm tak a ni.

Storm Drain project hi, a lui kuang awmdan azirin a zau zawng leh a bang sân zawng a inang lo thluah thung. Hmun 11 kan tlawhnaah hian, a tlangpuiin a chhuat hi metre 2/3 a zau a ni a, a bang san zawng pawh metre 1 leh a chanve vel a ni hlawm. A chhuat hi a hnuai zâwkah PCC a siam a ni a, a chungah RCC in chhun khah leh vek a ni a, a tlo ṭha turah ngaih a ni. Project Monitoring Committee ten uluk taka an vil avâng hian, a ṭha hlawm viau. Kan la tlawh loh hmun pakhat erawh PCC leh RCC hman tur anih laiin, contractor in beisei angin a siam lo a, veng chhung miten an sawisel avângin department lamin an vil zui vat a, a ṭul dan azirin kan enfiah zel ang. Heti khawpa hmalakna ṭha a kal lai hian, mipui leh sorkar department mit tikhamtu lo nih bik hi a remloah ngai ang. Hetiang kawngah hian ZPM sorkar hi a thu tak riau a, thil ṭha tur a ni a, mipui pawhin kan thlawp zel a ngai. Eng sorkar pawh lo piang se, thil ṭhaah chuan thlawp zel ila, a zar zotu tur kan ni zel dawn.

Hunthar Vengah Storm Drain siam hmun hniha mi kan tlawh a, pakhat chu Hunthar lei tla hniam bul National Highway 108 thlanga mi a ni. Lei chêt ṭhinna a nih avângin sorkar kal tawhte pawh khan an ngaihven hle a, phai lam mithiamte pawhin an rawn en ṭhin. UD&PA department aṭang hian lui kawr hi siam a lo ni tawh a, tuna sorkar hian hmun danga a kalpui ang thoin lian zawkin a chhunzawm thung. Sorkar kal tawhte khan tuna ram puma Storm Drain kalpui ang tak tak hian a ti chiah lo a, leimin fona lai a nih avângin kut an lo thlak tawh tihna a ni ber a, hei hi tun sorkar hmalakna zau tak nen a danglamna a ni deuh ber. Hunthar Veng, veng nuam lei sira luikawr siam leh Chawnpui luikawr siam erawh fur ruahtui tla hmasa khan a hnawl chhe nual a, a pawi hle. An Iron rod hmante erawh a sirah an dah khawm a, chhut ngila hman leh theih mai tur kha, a thar vek an hmang a, an uluk hle. Durtlang Hmundo Zauah kan kal a, a viltu PMC nen Storm Drain ṭha ber a ni em te kan ti hial a, rawng an lo hnawih a, a ti hmuhnawm riau a, kan lawm a zual deuh a ni mai thei.

Hmun ṭhenkhata contractor ten an lo sawi erawh a mak deuh. Kawrah ek sah ching an awm a, hei hian hnathawktute a hnawt kir zauh zauh a, thawktu dang an lak leh phah a ngai a, hna a hautak phah a, a zialo ṭhin hle. Heng hmun 11 kan tlawhnaa Local Council te hi ZPM LC an tam ber a, thu an uar lutuk loh nan kan inngaithla uluk hle a, an lawm dan erawh a uchuak lo a, ngaihthlak pawh a nuam tawk ṭhin hle.

Sorkarin thil ṭha a tih sawi tur leh puangzar tur hian party rui â but rilru pua kan lo ip ve a ṭul lo a, a ṭha lo sawi mam tum lutukna hian thil hi a nih dan tur emaw, a nih dan tur hnaivai tal pawh pha loa a kalpui theih avângin helai politik hi a fim a ngai a. A ṭhatna tur a nih avânga thil harsa pal chat ngamte hian lam ṭang an ngah zel dawn a ni ber. Hmasawnna hnathawh hi a ṭhat dawn phawt chuan, at huai sorkar hi hmuh tur awm fo se, “ZPM sorkar hnuaia hnathawh chu a ṭha bik tur a ni,” tih zirtirna hi a takin min hmuh tir ngam zel se la, mipui chuan, "Amen" kan lo ti zel dawn a, chu chu sorkar lokal leh zel turte laka mipuiin beiseina kan neih dan tur a ni ang.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]