MIZORAM RURAL BANK PRO VOLLEYBALL LEAGUE 2026
May 11 - June 13, 2026 @ LPS Arena, Falkland, Aizawl
RESULT
Round 3 : May 19, 2026 : Thawhlehni Zan
Tuichangral def Anastasia Electric Veng (mipa)
= 17-25, 25-19, 21-25, 25-21, 15-12 (3-2)
* A umtu zawk ni chungin Tuichangralin tha takin an bei let a, thawhlehni zan Mizoram Rural Bank Pro Volleyball League-ah champion lai Anastasia Electric Veng nen set nga an inkhel hnuah, an mamawh rilru lama fiahna pawimawh tak pal tlangin hnehna an sual chhuak.
* Sri Lanka atanga an lak luh Mahela Indeewar chuan khaw chhak team tan a theihna nasa leh zualin a lantir a, vawi 40 vaw tlain point 13 paih tel mah se mi malin a filawr. An khelh hnuhnun vawi hnihah Tuichangral an chak zawn a, Swiss League-a khel thin Mahela chuan hnehna kawngah team hruaiin Kuriz Player of the Match lawmman a dawng zawn.
* Chiang taka set hmasa ber an hloh hnuah Tuichangral an insiam tha a, hmasawn zawka an khelh theihna chhan pawimawh Lalrinpuia'n Anastasia ball vuak dangin taima takin a zuang a, team thar hlak ang maiin set hnihna atangin an inlan. Rinpuia'n point 13 hlawh chhuakin tum li chiah a tisual a, Saidingpuia Sailo chuan tum 11 hlap tlain point riat a hloh a ni.
* Set thum faia Thutak Nunpuitu Team an hneh hnuah Tuichangralin set nga inkhel turin rilru leh taksa lamah an inpeih tawh tih an lantir a, league bul an tannaah Khawbel nen set nga an inkhelh hnuah a chak lo zawkah an tang tawh a ni. Anastasia hmaah set hnih an hloh avangin point thum erawh an hmu zo lo va, point hnih neih belhin khelh thumah point ruk hmuin pathumnaah an insawn chho.
* Electric Veng club an nghet tawk lo va, an hneh tawh TNT leh Khawbel lakah set hloh tel ve vein Tuichangral lakah vawi hnih set la hmasa zawk ni chungin an tlawm. Chutih rualin a chak lo zawk ni mah se set hnih an lak avangin point khat an neih belh a, khelh thumah point sarih hmuin table chung berah an kir leh a, anni aia vawi khata khel tlem Hunthar leh an hneh loh Tuichangral aiin point khatin an sang a ni.
* Anastasia tan an khelh hmasak vawi hnih aiin Khawhai tlangval Zomuansanga a che tha ve thung a, tum 25 hlap tlain point sarih a paih a, Karthik Madhu chuan vawi kua tisualin point 19 a hmu. Zosangzuala (Mama) chuan point 14 hmuin point li a paih a, set khatnaah Laldinsanga'n mittlung takin khel mah se set hnihna atangin chet a harsat a, vawi riat a vuak tlak laiin point nga a hloh.
* India captain hlui Karthik an lak luh atangin Pro Volleyball-ah khelh ruk an chak zawn hman a, a tum khat nan an tlawm. Nikumah league khelh hnih an la nei tihin Anastasia-in Tamil Nadu player an chhawr tan a, Tuichangral an hneh hnuah vawi thum chak zawnin an champion. Trophy humhim turin tun tumah bul an tan tha a, vawi hnih an chak zawn chhoh laiin Tuichangral erawh an khelh hmasak berah Khawbel an hneh lo nghal.
* LPS Arena-ah rin hlawh zawk Anastasia-in set hmasa ber an awpbet hle a, Karthik bakah Zomuana leh Dinsanga'n ball an hmuh vaw tla zelin Mama'n lehlam hlap a dang tha hle bawk. Tuichangralin vuak tlak an harsat rualin vawi khat mah lehlam hlap dang tla ve lovin set khatna an hmang zo va, Electric Veng club el turin awmzia an nei pha lo.
* Mahse, set hnihna an tan rualin lehlam vuak dan tumin an bei ngawrh a, a hma aiin an ball hlapin awmzia a nei bawk. Chet vel awlsam leh zuang sang tak Mahela chuan a khelh thiamna ding lam sir (universal) atangin lehlam ban pharna chungah a vaw tla fo a, team fuih phurin an danglam a, set hnihna tir lamah tum nga Anasatasia ball vuak an dang tla zawn. 15-15 atangin Tuichangralin an kalsan thei a, Mahela chuan a vuak tlak hnuah a elpui Karthik chuan point a hloh a, Lalruatsanga leh Dinsanga hlap dang zawn zui lehin Anastasia an talbuai a, 22-16-a sang zawk an nih hnuah harsa lovin khaw chhak team an tlang.
* Set thumnaah Electric Veng club intuai thar ve thungin Zomuana leh Dinsanga thlaktu Ngursangzuala'n team boruak tinungin an vaw sual mang lo. Tuichangralin an insawrbingna an hloh a, tihsual leh ho taka point hloh an chin avangin 17-10-in Anasatasia an sang a, a vawi hnih nan harsa lovin set an la. Dinhmun derthawng atangin hnual lovin Tuichangralin set linaah an nawr let a, Mahale chuan ngaiawh lehin Saitea'n dan theih lovin a vaw tla fo bawk a, Rinpuia'n tha taka an vuak a dansak tel bawk avangin Anastasia an tla hniam.
* Set tinah inkhel boruak inthlak hlawkin an inchet that chhawk a, Tuichangralin set lina an lak ve leh rualin inrintawkna leh phurna sang tak nen set hnuhnung ber an hmachhawn. 10-10 a nih laiin an awmna hmun a dik loh vangin Anastasia-in point an hloh a, Rinpuia'n hlap tla zuiin point hnihin Tuichangral an sang a, 14-12 a nih laiin Mahela chuan chakna point hlu tak a hlawh chhuak a ni.
* Round linaah Tuichangral awlin an khelh leh hmasak berah Hunthar nen May 27-ah an intawng dawn a, an dinhmun chiang leh zualin a hriat theih ang. Ninganiah Anastasia-in khel zui ve thungin anni ang bawka insiam that mamawh Sihphir an hmachhawn dawn a ni.
Kuriz Player of the Match
- Mahela Indeewar (Tuichangral)
Cheetak Fan of the Night
- Jerry MS Hmar (Khawhai)
MVA Lucky Fan
- Mary Lalruatkimi (Tuichangral) & Lalnunmawia (Electric Veng)
STATS :
TUICHANGRAL
Mahela Indeewar : Point Hmuh - 40, Point Hloh - 13
Lalrinpuia: Point Hmuh - 13, Point Hloh - 4
Saidingpuia Sailo : Point Hmuh - 11, Point Hloh - 8
Amos Vanlalpeka : Point Hmuh - 7, Point Hloh - 3
Lalropeka : Point Hmuh - 2, Point Hloh - 2
Zonunsanga : Point Hmuh - 1, Point Hloh - 2
H Lalramdinmawia (setter) : Point Hmuh - 7, Point Hloh - 1
ANASTASIA ELECTRIC VENG
Zomuansanga : Point Hmuh - 25, Point Hloh - 7
Karthik Madhu : Point Hmuh - 19, Point Hloh - 9
Zosangzuala : Point Hmuh - 14, Point Hloh - 4
Laldinsanga : Point Hmuh - 8, Point Hloh - 5
Ramdintluanga (setter) : Point Hmuh - 4, Point Hloh - 1
POINT TABLE
ANASTASIA : Play 3, Won 2, Loss 1 (set lak 8, set hloh 5) : Point 7
HUNTHAR : Play 2, Won 2, Loss 0 (set lak 6, set hloh 1) : Point 6
TUICHANGRAL : Play 3, Won 2, Loss 1 (set lak 8, set hloh 5) : Point 6
SIHPHIR : Play 2, Won 1, Loss 1 (set lak 4, set hloh 5) : Point 2
KHAWBEL : Play 3, Won 1, Loss 2 (set lak 4, set hloh 8) : Point 2
CHHINGA VENG : Play 1, Won 0, Loss 1 (set lak 2, set hloh 3) : Point 1
TNT : Play 2, Won 0, Loss 2 (set lak 1, set hloh 6) : Point 0
FIXTURE (mipa) - Round 3
May 20, 2026 (Nilaini)
8:00 PM : Chhinga Veng Spikers v Thutak Nunpuitu Team
Round 4
May 21, 2026 (Ningani)
8:00 PM : Sihphir v Anastasia Electric Veng
May 22, 2026 (Zirtawpni)
8:00 PM : Khawbel v Chhinga Veng Spikers
May 23, 2026 (Inrinni)
8:00 PM : Hunthar v Thutak Nunpuitu Team
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: