Pro Volleyball | Anastasia-in 3 - 1 in Khawbel an hneh

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 2 : May 14, 2026 - Ningani Zan

Anastasia Electric Veng def Khawbel (mipa)

= 22-25, 26-24, 25-23, 25-22 (3-1)

* Set an hloh hmasak hnuah champion lai Anastasia Electric Veng kir lehin Mizoram Rural Bank Pro Volleyball League-ah hnehna an chang zawn a, set hnihna atanga set thum an lak zawn rualin Khawbel nen Mizoram volleyball inelna sang bera vawi thum an insut tawhah an chak vek.

* Thawhtanni khan championship hawn nan nikum final-a an hneh tawh Thutak Nunpuitu Team lakah set thum set khat thovin Anastasia an chak tawh a; Tuichangral hmaa chak tawh Khawbel lakah a hma aia inkhairual leh hriam leh zualin an inlan a, Karthik Madhu chuan point 20 hmuin Zosangzuala (Mama), Zomuansanga leh Laldinsanga'n point 10 chuang vek an hlawh chhuah bakah, set thumna atangin Ngursangzuala'n tum riat a vaw tla bawk a ni.

* Nikumah a vawi khat nan Pro Volleyball-ah Khawbel an tel a, league-ah set thum set khatin Electric Veng Club an hneh lo va, semifinal-ah a hma aia chiang zawk set thum faiin Anastasia-in an hneh nawn. Tun season-ah set thum set hniha Tuichangral hnehin Khawbelin tha takin league bul an tan a, inrintawkna sang tak nen Anastasia hmaah tha takin a tir lamah khel mah se set khatna an lak hnuah an nghet zui lo. Hun pawimawhah an insawrbing tawk loh avanga point an hloh thin an tuar a, Anastasia angin inelna sangah danglamna siam thei player an ngah tawk lo tih a lang bawk.

* Mi malin Khawbel captain Johan Vanneihsanga a che tha a, vawi 29 hlap tlain point riat a hloh a, a team chakpui zo lo mah se Kuriz Player of the Match lawman a dawng. A kawppui Anurag Rawat a tla hniam ve thung a, point 28 hmuin tum 16 a tisual a, an pahnih ni lo player dang zingah point nga aia tam hmu phak an awm loh avangin team pum pui khaikhinin Anastasia an el zo lo deuh.

* Set hmasa berah Johan-a leh Anurag chuan a hma leh hnung atangin ball an hmuh an hlah mang lo va. Delhi tlangval Anurag chuan a vuak tlak hnuah Anastasia spiker Karthik-a hlap an dansak a, 22-18-in Khawbel an sang. Anastasia-in an hnaih chilh hman tawh lo va, 24-22-a nih laiin Johan-a'n inringtawk takin a vaw tla a ni.

* Set hnihnaah tawn hriat nei tha zawk Anastasia-in hma an sawn hret a, point inhmuh chhawk chhovin 24-24 a nih laiin Mama'n a hlap tla a, Khawbelin nih rual leh nghal thei turin Johan-a'n hun tha a neihah a vaw sual ve thung a, Electric Veng Club-in set an lak phah.

* Anastasia-in mar pangngai takin an khel zui a, ball vaw tla thei player duhthlan tur an ngah zawk bakah lehlam hlap dan kawngah Mama leh Karthik chuan an thawh hlawk tel bawk. Khawbelin Johan-a leh Anurag an chhawr rim hle a, inhnehtawk tak chungin set la zui zo lovin hun an hmang tluan a, season liam taa Anastasia laka an tlawm tawhna chhan let an tumna an puitlin thei ta lo a ni.

* Anastasia an chak zawn rualin mipa inelna huanga champion hnem ber Hunthar nih ruala a vawi thum nan champion an tumna kawngah rin an hlawh a, May 19-ah inlan lehin Tuichangral nen an inkhel ang. Khawbelin insiam that mamawh chungin May 18-ah Hunthar an khelhpui ve thung dawn a ni.

Kuriz Player of the Match

- Johan Vanneihsanga (Khawbel)

Cheetak Fan of the Night

- Lallawmsiami (Khawbel)

STATS :

ANASTASIA ELECTRIC VENG

Karthik Madhu : Point Hmuh - 20, Point Hloh - 11

Zosangzuala : Point Hmuh - 12, Point Hloh - 2

Zomuansanga : Point Hmuh - 14, Point Hloh - 7

Laldinsanga : Point Hmuh - 13, Point Hloh - 7

Ngursangzuala : Point Hmuh - 8, Point Hloh - 2

KHAWBEL