NEET question put ru avangin cancel, exam buatsaih tha leh dawn

Aizawl | May 12, 2026: National Eligibility cum Entrance Test (NEET) exam May ni 3-a neih zawh taka question paper a put ru ni-a hriat a nih avangin cancel a ni a, exam buatsaih that leh a ni dawn.

Ram pum huapa damdawi thiamna lam zir chhunzawm tumtute tana entrance exam buatsaih thin, NEET-UG exam, tun thla ni 3-a buatsaihah khan thil fel lo thleng ni-a hriat a nih avangin cancel a ni a, exam buatsaihtu, National Testing Agency chuan thil thleng chungchanga thuthang chhui chiang turin Central Bureau of Investigation an thlawp tur thu leh hemi chungchang hi an ngaih thu tak thu an sawi a. Zirlai exam hmachhawn nawn leh turte tan inziah luh nawn leh emaw, fee chawi nawn leh emaw a tul loh tur thu sawiin, zirlaite leh an chhungte tana harsatna thlen tam lo tur leh an tana tha zawk tura thu tlukna hi siam a nih thu an sawi a ni.

National Eligibility cum Entrance Test (NEET) exam atanga ni 4 liam hnu, May ni 7 khan exam-a thil fel lo chungchang thuthang hi awmin, a tuk May ni 8-ah thuneitute hriattir nghal an ni a, report thenkhata tarlan a nih danin, NEET exam buatsaih hma lawk, May ni 1 vel atang khan hmun thenkhatah exam hmachhawn tumtute tana inpuahchahna 'guess paper' a darh chiam a. He 'guess paper'-a zawhna 281 awm zinga 135 chu exam zawhna-ah hian chhuakin, hetah hian Biology subject-a zawhna 90 leh Chemistry subject-a zawhna 45 a tel a. Zawhna chhanna 'A, B, C, D' indawt dan thlenga inzulin, mark 720 awm atanga mark 600 lai hmuh theihna a ni a. He 'guess paper' hi Kerala-a zirlai pakhat hnen atanga darh chhuak ni-a sawi niin, Rajasthan-a a thiante a thawn hnuah exam atana inpuahchah zirlaite hnenah cheng nuai 2 atanga nuai 5 thlenga hralh chhuah ni-a sawi a ni. Hemi kaihhnawihah hian Rajasthan-ah mi 5 man niin, mi 20 chuang thu zawh fiah mek an ni. NEET exam that leh hun tur hi puan a la ni lo.

- Meichher News

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]