MHIP-in AMC Corporator-a thlan tlin hmeichhiate chawimawi

Aizawl | May 15, 2026: MHIP chuan vawiin khan Central YMA Committee room-ah Aizawl Municipal Corporation (AMC) Inthlanpui Vawi 4-naa Corporator-a thlan tlin hmeichhiate chawimawina hun an hmang.

MHIP President lo ni tawh thin, MHIP Gen. Hqrs Adviser B Sangkhumi chuan thu sawiin, AMC Corporators ni thei hmeichhiate chu chhuanawm a tih thu a sawi a, Mizo hmeichhiaten tih dan thin mawi tak mai, lungngaite tawrhpuia, lawmte lawmpui ṭhin hi a nih thu a sawi. General seat atanga AMC Corporator tura thlan tlin hmeichhia an awm chu ropui tiin, hmasawnna tha tak a nih thu a sawi bawk.

B Sangkhumi chuan, reserved seat chu ngaihhniam tur a ni lova, hmeichhiate tana politics leh ram inrelbawlnaa an tel ve theihna kawng hawntu a ni tih hriain, reserved seat chu ram tan leh hmeichhiate tana hmasawnna thlen tura hmang turin a fuih. AMC Corporator atan hmeichhiate thlan a nih theih chhan pawimawh tak pakhat chu, MHIP-te’n kum 1997 aṭanga women empowerment-a hma an lo lak tawhna kalzel rahchhuah a nih thu a sawi.

MHIO Adviser B Sangkhumi chuan Mizo hmeichhiate chu thiamna leh finnaah an hniam loh thu sawiin, ram inrelbawlna sang zawk State Legislative Assembly mai bakah, India Parliament-a ṭhu thei turin a fuih bawk. Mizo hmeichhiate hriat tur pawimawh tak chu tanrual a nih thu sawiin, AMC Corporator tharte chu MHIP-te nena thawhhona tha tak nei zel turin a chah bawk.

AMC Corporator-te aiawhin R Lalawmpuii chuan thu sawiin, MHIP-ten hmeichhiate chawimawina hun an buatsaih ṭhin chu lawmawm a tih thu sawiin, AMC-a hmeichhiaten seat reservation an nei thei chu MHIP-te thawhrimna rah a ni a ti bawk. Corporators-a thlan tlin hmeichhiate chuan ram leh hnam tan leh hmeichhiate chawikanna turin theihtawp an chhuah tur thu a sawi a. MHIP-te hmalaknate chu chhuanawm a ti a, hmeichhiate tan chauh ni lovin,ram leh khawtlang tan te, chanchhe zawk te, ṭanpui ngaite tana ke an penchhuak thin chu ropui a tih thu a sawi bawk. MHIP-te chu an phak ang tawka puih an inhuam reng thu a sawi bawk.

Chawimawina hun hi MHIP Gen Hqrs General Secretary Irene Lalruatkimi'n a kaihhruai a, MHIP President Lalliani'n chawimawina a hlan a ni.

He inkhawma MHIP-in chawimawina a hlan AMC Corporator hmeichhiate chu:

1. R Lalmawipuii-Ward II

2. Vanlalhriatrengi-Ward IV

3. Dr Lallawmkimi-Ward V

4. Christina Roluahpuii Sailo-Ward VII

5. B Lalawmpuii- Ward IX

6. Helen Rualchhingi- Ward XI

7. Vanlalhruaii- Ward XII

8. R Lalawmpuii- Ward XVI

9. Lalremruati Sailo- Ward XVII

Inkhawm hi MHIP President Lalliani chuan kaihruaiin, MHIP Vice President Ngurmawii Sailo chuan ṭawngṭainain inkhawm a khar a ni.