High Court-in MZU Registrar nilai nihna a hlihsak

Aizawl | May 28, 2026: Gauhati High Court, Aizawl Bench chuan nimin khan Mizoram University (MZU) Registrar nilai Professor Lalnundanga chu a post chelh lai, 'Registrar' a nihna a hlihsak.

MZU atanga Registrar nihna an hlih sak tak Prof Lalnundanga term hi April 30, 2024 khan a tawp a, MZU Vice Chancellor chuan May 1, 2024 atanga khan a hna hi a thawk chhunzawm turin thuneihna pe a, a term hnihna chelh leh tura interview a hmachhawn thlengin a nihna hi a chelh niin sawi a ni.

Prof Lalnundanga hian Registrar hna hi term khat (kum 5) a chelh hnuah November 19, 2024 atang khan a term hnihna hi a chelh leh a, mahse, he dinhmun a chelh leh danah hian thil fel tawk lo awm nia an ngaih avangin Registrar ni tura a candidate pui pahnih te chu December 13, 2024 khan court-ah an zualko ta niin thu dawn a ni.

An thubuai hi hun eng emaw chen ngaihtuah a nih hnuah nimin khan High Court Judge chuan thutlukna hi a siam a, Prof Lalnundanga chu MZU Registrar a nihna a hlih sak ta a ni.

Thu dawnna-in a tarlan danin Registrar thar la tura board-a thu tura rawtna leh sawmna pawh hi Prof Lalnundanga siam, e-mail thawntu pawh amah bawk nia an hriat thu an tarlang a, board a thu te pawh hi a hre lawk sa vekah an ngaih thu an sawi.

MZU Registrar term kal mek atan hian mi 10 te chuan dilna an thehlut a, Oct 23, 2024 khan interview neiin, mi 6-in interview hi an hmachhawn a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]