E Lungdar-in HSLC topper chawimawi; HSLC Topper-in mobile phone a la nei lo!

"Ram hmasawnna leh intodelhna turin 'education' bawk hi Mizo te tân chuan innghahna a ni, " ~St Joseph HSS Principal

E Lungdar | May 1, 2026: HSLC Examination 2026-a pakhatna Rachel Biakṭhapari, St. Joseph HSS, chu East Lungdar Village Council, All NGOs leh All Political Parties ten Thangburha Hall, E. Lungdar-ah vawiin May ni 1, 2026 hian chawimawina an nei a. Rachel-i pa Salai Chan Uk chuan thusawiin, Rachel-i chuan vawiin thlengin mobile phone a la neih loh thu a sawi.

"Phone kan neihtir lo, thuamhnaw lamin kan duat ngai lo a, hmawmsawmin kan duat ngai lo bawk. Phone nei lovin tun thleng hian a awm a, chu chu a hlawhtlinna chhan ber pakhatah ka ngai. Hunawl kan neihtir ngai lo," tiin Rachel-i pa chuan a sawi.

Rachel hi Class 9 a zir hma zawnga East Lungdara lehkhazir a ni a, Class 9 aṭangin St. Joseph HSS-ah a kal ṭan chauh a ni.

Chawimawina huna thusawi tura sawm St. Joseph HSS Principal C Laltlansanga chuan thusawiin, "Ram hmasawnna leh kan intodelhna atana ṭangkai ber chu 'education' a ni a, vawiin thlengin hei hi Mizote tana pawimawh ber a la ni. Rim taka lehkha kan zir hi a la ngai a ni. Chumi tur chuan theihtâwp tak meuha kan zir a, all India leh Central Civil Service-ah a tam thei ang ber Mizo hi kan inziah tlin a ngai a ni," a ti.

"Sumdawng lian leh Company liana thawk turin lehkhazir bawk a pawimawh a ni," a ti a. "Sapramah te industry nei ṭha, lo neihna ram nei ṭha leh company nei ṭha te chuan education hi an innghahna a ni lo maithei. Keini India rama kan awma kan ram dinhmun enin education hi kan innghahna lian ber a ni," tiin St. Joseph HSS Principal chuan 'education' chu uar takin a sawi duh ṭhin thu a sawi.

Rachel Biakṭhapari chawimawina hunah hian E. Lungdar VCP Vanlalhlua Chhangte chu Chairman a ni a. Ramtharnghaka, Treasurer, VC E. Lungdar chyab lawmpuina thu a sawi a ni. Lawmpuina leh chawimawina hi All NGO, All Political Party bakah a duy apiangin an hlan a ni.