A ṭum li nan YMA Electric veng-in career fair buatsaih; "Mizote Central Service mai bakah SSC lamah lut kan tlem ta hle mai a, kan tan tlan a ngai tak zet," ~ Home Minister

Aizawl | May 2, 2026: YMA Electric Veng Branch YMA Literature & Education Sub-Committee te buatsaih 'Career Fair' chu May ni 2, 2026 (Inrinni) chawhma dar 10:00 khân Electric Veng YMA Hall-ah Home Minister K Sapdanga'n a hawng.

Career Fair hawngtu K Sapdanga chuan Career Fair chu thil hautak, a buatsaihtu changkan ngai bawk, a rawn kal te thil chik mi leh thil tih tak tak tum, hetiang ang mi te tana kawng kawhhmuhna hun tha a bial chhung ngei a, Electric Veng Branch YMA ten Career Fair an buatsaih thei chu lawmawm a tih thu leh chhuanawm a tih thu a sawi a. Tunhnaiah Mizote Central Service mai bakah SSC lamah lut kan tlem ta hle mai a, kan tan tlan a ngai tak zet a ni. Central lam dawr changa Mizo hnathawk an lo awm hian an tangkai thin zia a sawi a.

Sapdanga chuan vawiina Career Fair-a lo tel zirlai zawng zawngte chu tum mumal nei chunga an lehkha zir chhoh zel nan Career Fair hmang tangkai turin a chah bawk.

Thu a sawi zawh hian Stall hrang hrang tlawhna hun a hmang a ni.

Career Fair hi zirlai naupang ten lehkha an zir chhoh zelna turah kawng dik zawk leh ngaihtuahna fing tak an neih theihna tur leh nakina eizawnna kawng an zawh hun a hlawhtlinna an neih theih nân a buatsaih a ni a. EYMA hnuaia Literature & Education Sub-Committee hian kum 2023-2025-ah te khân hlawhtling takin a lo buatsaih tawh bawk a ni. Electric Veng Branch YMA chuan lehkha zir dan dik zawk inkawhhmuh hi a ngaih pawimawh avangin Career Fair hi a buatsaih a ni.

Career Fair-ah hian Stall hrang hrang a awm a - Arts, Commerce, Science, Special Education, Law, Mass Media & Communication, Management /Baking, Hospitality/ Tourism, Military, Territorial Army, Medical, Engineering, Handmade Business, Fashion Designing leh Cruise lama tui mite tan Stall buatsaih a ni bawk. Stall-ah hian hetiang lama hlawhtlinna lo nei tawh veng chhung mithiamte rawn theihin an ṭhu a ni. Tin, heng bakah hian Booktale, Beer Seba Group of Institutions, Medhavi Foundation, Women's Polytechnic Aizawl, R&D Consultancy-te Career Fair-a tel turin sawm an ni bawk.

Career Fair-ah hian veng chhunga zirna in te bakah veng ṭhenawmte leh sikul hrang hrang sawm an ni a, zirlaiten an hlutin tlawhtu an ṭhahnem hle a, a kal ten an hlawk pui hle. School naupang mai bakah naupang thenkhat chu an nu leh pa ten rawn hruaiin hun hlawk tak an rawn hman pui bawk a ni.

Career Fair hi Pawl 10 leh Pawl 12 zir zo chiah te leh Pawl IX aṭanga zir chho tur te tana lehkha zir chhunzawm dan tur inkawhhmuhna leh infuihtharna atan buatsaih a ni. Career Fair hi chawhma dar 10:00 aṭanga tanin tlai dar 4:00-ah zawh fel a ni.