"Ruihhlo avangin Zonunmawi - Tlawmngaihna pawh a dal phah tawh," ~ Central YMA GS

Aizawl | April 1, 2026: Young Mizo Association (YMA) Chawlhhmun Branch chuan March 31, 2026 (Thawhlehni) zan khan an veng Community Hall ah YMA Kumpuan 'Ruihhlo Do' hawnna hun an hmang. Kumpuan hawnna hun hi Vice President H Lalrammawia'n a kaihruai.

He hun hman pui tu leh kumpuan hawngtu, Central YMA General Secretary Prof Malsawmliana chuan, “ ruihhlo hluar avangin khawtlang nunah pipu nun mawi tlawmngaihnate, inlainat tawnna te a tlakhniam phah a. Ruihhlo zuarte pawh khawtlang tan mi hnawk an lo ni ta. Ruihhlo in kawng tinrengin Mizote min run a ni ber mai.

“ YMA te hian khawtlang nun siamthat leh Zofate hmasawnna ngaihtuah hi kan hna pui a nih angin ram nuam leh him, khawtlang nun nuam kan neih theihnan khawtlanga sual chi hrang hrangte hi kan do tlan a ngai. Ruihhlo tello khawtlang nun nuam siam turin i tangrual ang u” a ti.

Kumpuan hawnna hunah hian Central YMA atangin CEC member 5 an tel a. Chawlhhmun khawtlang hruaitu LC, MHIP, Local Security Service (LSS), Kohhran hruaitute leh Kohhran hrang hrang thalai hruaitute an tel bawk.

Chawlhhmun Branch hian Central YMA General Secretary hi Khuallam nen an lo dawngsawng a ni.