MISA General Conference hmang; MIS officer-te lawm lut

Aizawl | April 1, 2026: Mizoram Information Service Association (MISA) chuan vawiin khan I&PR Conference Hall, Lianchhiari Run-ah kum 2026 MISA General Conference an hmang a. He hun hi IPRP&S Department Secretary Betsy Zothanpari Sailo, chuan khuallian niin a hmanpui.

He hunah hian khuallian IPRP&S Department Secretary Betsy Zothanpari Sailo, chuan MISA member-te fuihna thu leh lut tharte lawmna thu sawiin, MISA Conference hlawhtling taka hman theih a ni chu lawmawm a tih thu a sawi a. MISA member-te chu intuaithar a, ram leh hnam tana chhenfakawm lehzuala sawrkar kum thar tana inhlan thar turin a chah a. Mipui vantlang tana information pawimawhna leh sawrkar hmel tar langtu an nihna dinhmun pawimawhnate ngun taka ngaihtuah a, Conference chu hlawk taka hmang theuh turin duhsakna a hlan nghal a ni.

MISA General Conference hi chawhma lamah hawnna hun hman niin, nikum lama MPSC buatsaih Civil Services Combined Competitive Examination-a lut thar MIS officer-te lawm luh nghal an ni a. Chawhnu lamah rorelna leh MJA General Headquarters hruaitute kaihhruaiin 2026 - 28 atana MISA hruaitu tur thlanna hun hman nghal a ni.

MISA General Conference hawnna pual inkhawm hi MISA Vice President Pratap Chhetri chuan kaihruaiin, MISA President Malsawmsanga'n kal khawmte lawmna thu a sawi a. MISA General Secretary Andrew H Lalremruata hnen atangin report ngaihthlak niin, I&PR Director & MISA Patron K Vanlalsangi hnen atangin thusawi ngaihthlak a ni a. MISA Treasurer C Lalremruati'n lawmthu sawiin hawnna hun hi a khar a ni.