Langtlang taka MUHCS kalpui turin Mizoram Information Commission in Mizoram Health Care Society a hriattir, Synod Hospital nena inremna a thlawna pe turin ti

Aizawl | April 16, 2026: Langtlang taka MUHCS kalpui turin Mizoram Information Commission in Mizoram Health Care Society a hriattir a, Synod Hospital nena inremna a thlawna pe turin SPIO a hriattir.

Advocate J.Malsawmzuala Vanchhawng in RTI hmanga zawhna a siam, a huna chhan a nih loh vang leh chhanna a dawnah a lungawi loh thu a thlen chu Mizoram Information Commission full bench chuan April 9 khan a ngaihtuah a, Hearing-ah hian complaint thehluttu leh Mizoram State Health Care Society SPIO leh RTI zawhna luh hunlaia SPIO te an inlan a, Mizoram Health Care Society leh Synod Hospital ten MUHCS kalpuina tura inremna an ziah copy leh detail pricing chu April 17 naktuk ral hmaa Complainant hnena a thlawna pe turin State Information Commission hian SPIO chu a thu a pe a ni.

MUHCS kalpuinaah mipui sum hman a ni chungin sorkar chuan thup tam tak a nei niin Complaint thehluttu hian a sawi a, Mizoram Health Care Society in Damdawi In hrang hrangte inremna a ziahpuiah thuruk anga vawn tur tih tarlanna ‘Confidentiality Clause’ dahlut telin, hemi behchhana hmang hian Damdawiin hrang hrang nena inremna an siamte chu mipui hriat theih loh turin an thup tlat a. Mizorama Private Hospital-te pawhin Mizoram chhung leh pawn lam Pvt. Hospital dangte leh sorkar inremna siam dan an hriat theih loh avangin vawiin thlengin MUCHS an zawm theih loh phah a, a tuartu chu MUHCS zawmtu, sorkar hnathawk, pensioner leh mipui nawlpui, damlote an nih leh si avangin Appeal hi a thehlut tih Complainant hian a sawi.

~ AIR Aizawl

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]