Formosa Foundation-in YMA hnenah ambulance hlan; "Formosa Foundation thil tum kan hrechhiang a, an hmalaknaah YMA chu an bulah a ding tlat dawn!"

Aizawl | April 14, 2026: Reliance Foundation-in Formosa Foundation, India kaltlanga Central YMA hnena Ambulance an hlan chu Vawiin April 14, 2026 (Thawhlehni) zing dar 7:00 khan sem a ni.

Ambulance hi Central YMA chuan Chalfilh Group YMA hnenah an lo hlan tawh a, tukin zing dar 7:00 khan Aibawk-ah Chhimphei Group YMA leh Hmuifangtlang Group YMA kutah pakhat ve ve an hlan leh a ni.

Central YMA hruaitute vek hian vawiin chawhnu dar 2:30 khan Convention Center, Lunglei-ah Ambulance hlanna hun hi hman chhunzawm in, Zobawk Group YMA, Pangzawl Group YMA leh Chawngte Group YMA te bakah MTP Sub-Headquarters, Tipa V leh YLA Sub-Headquarters, Sangau te hnenah an hlan tel ve bawk a ni.

He hun hi Sub-Headquarters YMA Lunglei President K Lalfakzuala'n a kaihruai a. Fakzuala chuan kan NGO pui YLA Sub-Hqrs, Sangau leh MTP Sub-Hqrs, Tipa bakah YMA Group hrang hrang Zobawk, Chawngte, leh Pangzawl Group ten thilpek hlu tak an dawng chu a lawmpui hle tih a sawi. He thilpek hian tlawmngai pawlte tha a tichak dawn a, a tawpah chuan mipui tan malsawmna a nih tur thu a sawi bawk.

Formosa Foundation India Chairman Jonathan Lalremruata chuan thutawi sawiin, Formosa chu Covid-19 hripui len laia din a nih thu leh NGO an ni a, YMA behchhana hma an lak thin thu a tarlang a. "Kan partner company-te nen Mizorama kan luanchhuahnaah hian Mizo mipui mit timim zawnga ke pen kan tum ngai lo," tiin, phut let leh beisei let nei lova CSR (Corporate Social Responsibility) hmanga hma la an nih thu a sawi a. Ram leh hnam tan a tul ang zela luanchhuah zel an tum thu a tarlang bawk.

Central YMA President R Lalngheta pawhin thu sawiin, tanpui ngaite tanpui nan leh ruihhlo dona kawnga hmanraw tangkai tak tur Reliance Foundation ten Formosa Foundation kaltlanga an rawn pe thin chu lawmawm a tih thu a sawi a.

Ngheta chuan YMA laka hmuh dan dik lo nei thinte chhangin, "Mi thenkhatin YMA hi lei theih ang hiala min chhuah thin an awm a, mahse, YMA hi lei theih kan ni lo tih kan hriat tlan a tul a ni," a ti a. ""Formosa Foundation thil tum kan hrechhiang a, an hmalaknaah YMA chu an bulah a ding tlat dawn!" a ti a, Formosa Foundation chungchanga chirhtheh rawn awm thinte chu an tum an hriatchian thu sawiin, an hmalaknaah YMA chu an bulah a din tlat tur thu a sawi bawk.

Mizoram zimtea hnam bil anga inthendarh hi YMA chuan a remti lo tih lantir nan he Ambulance semnaah hian YLA leh MTP-te pawh huang khatah an awm vek tih a sawi.

Finance Secretary MS Ralte chuan, Reliance Foundation kaltlang hian ruihhlo dona atana hman tur Mahindra Bolero Campers 9 an lo dawng tawh a. Central Sawrkar pawhin lirthei 9 dang YMA hlan tura hma a la mek thu a sawi.

Vawiina sem chhuah tak Mahindra Ambulance (Bolero Neo) 15-te hi a hnuai ami te hnenah hian hlan an ni:

• YMA Zobawk Group

• YMA Chawngte Group

• YMA Pangzawl Group

• MTP Sub-Hqrs, Tipa V

• YLA Sub-Hqrs, Sangau

Ambulance hlanna hunah hian Formosa Foundation aiawhin Pu Clinton (Legal Adviser) leh NGO hrang hrang aiawhten inhlanna lehkha an ziak fel a. He hunah hian Central YMA CEC Member 5 bakah YMA Sub-Hqrs Lunglei OB-te leh SEC, Lunglei member-te an tel a ni.