World Hearing Day hmang, Kum 2025 - 26 chhungin Mizoram-ah Beng lama insawiselna nei mi 31735 awm

Aizawl | March 3, 2026: Ri Hriatna Ni hi vawiin March ni 3, 2026 khan khawvel pumpuiah a vawi 19 na atan hman a ni a, Mizoram-ah pawh a vawi 11-na atan Directorate of Hospital & Medical Education Auditorium, MINECO ah Dr. R. Lalchhuanawma, Mission Director, NHM kaihhruaina a hman a ni. He hunah hian Persons with Disabilities (PwD) Commissioner Vanlaldiki chu khuallian niin Dr Rita Zoramthari, MS ENT, Civil Hospital, Aizawl chuan tun kum World Hearing Day atan a thupui “From communities to classrooms: hearing care for all children” tih hmangin thu sawi na hun a nei bawk a ni.

World Hearing Day hi kum 2007 atang khan kum tin hman a lo ni tawh thin a. Geneva Headquarter in a rel ang in he Ni hian a tum ber chu Bengngawng te harsatna hriatthiam pui tur leh bengngawnna ti tlem tura mipui te hnena zirtirna zau zawk a theh darh hi a ni. Hei bakah beng natna a hma thei ang bera hmuh chhuah a, enkawl hma hian bengngawnna a thlen tur nasa takin a veng thei a ni.

WHO in a zir chianna ah Bengngawnna hi kan thil hriatna 5 (sensory organs) zinga piansualna ah a tam ber a ni a. Tunah hian khawvel pum pui ah mihring tluklehdingawn 1.5 (1.5 billion) vel hian ri hriatna chaklo an nei a, heng zinga maktaduai 430 te chu an beng a ngawng a, tun ang zela kan kal chho anih chuan kum 2050 ah chuan mihring 10 ah 1 zel hi an beng a ngawng dawn a chhut a ni. Hetiang anih avang hian kan beng hi kan enkawl uluk a ngaiin bengngawnna thlentu hrang hrang lakah kan in ven fimkhur a ngai hle a. Beng natna chi hrang hrang bakah damdawi beng ri hriatna chaklo thlen thei lakah te leh Ri bengchheng nasa lakah te kan inthiar fihlim a pawimawh hle a ni.

He mi kawnga hma la tur hian National Programme for Prevention and Control of Deafness (NPPCD) chu kum 2014, August thla atang khan Mizoramah pawh National Health Mission hnuaiah din tan a ni a. Tun kum FY 2025-2026 (April 2025 – January 2026) thlenga record in a tarlan danin Mizoram chhungah hian Beng lama insawiselna nei mi 31735 lai en niin beng natna emaw beng ri hriatna thalo nei mi 4750 hmuhchhuah tawh an ni a, 222 zat chu beng thalo vang a zai an ni tawhbawk. Hei mai bakah hian mi 1541 chu bengdar dawng tur leh Speech leh Therapy tul ang te ti tur a refer an ni. India ramah pawh tunah hian NPPCD, Mizoram hi hma la tha ber pawl an ni mek a ni. Hemi kawngah hian RBSK (Rashtriya Bal Swasthya Karyakram), Ephatha Society te, Ephatha Special School for the Deaf and Hard of Hearing, College Veng leh Redeem Garden, Durtlang te thawhpui an ni a. Hei bakah hian NILD - NERC (National Institute for Locomotor Disorder - North Eastern Regional Council), ALIMCO leh AYJNISHD (D), Bhubaneshwar te nen bengdar sem kawngah hian an thawk ho mek bawk a ni. ALIMCO leh NPPCD tangkawp hian Zoram Medical College & Hospital, Falkawnah tun kum FY2025-2026 (April - January) chhung khan Bengdar a mawmawhtu te hnenah 108 lai semchhuah tawh a ni bawk.