Supply Minister leh Rajya Sabha MP te'n Sairang-ah buhfai phur rel hmuak thleng

Aizawl | March 3, 2026: Food, Civil Supplies & Consumer Affairs (FCS&CA) Minister B Lalchhanzova leh Rajya Sabha MP leh State Consultative Committee of FCI Chairman K Vanlalvena chuan tukin zing dar 7:00Am khan Sairang Rel Station-ah buhfai quintal 25,901, Rel wagon 42-a lo kal Rel(Train) an lo hmuak thleng. He buhfai phur Rel( Train) lo hmuahna programme tawi, Food Corporation of India (FCI), Divisional Office in a buatsaih a ni.

Tukin Sairang Rel station programme–ah hian thu sawiin, Supply Minister B Lalchhanzova chuan Rel hmanga Sairang Rel Station a buhfai phurh thlena a lo awm ta hi Mizoram mipui tan thil chhinchhiah tlak tak nia a hriatthu sawiin, kan hma lawka furpui lo thleng turah pawh a thlamuan sawt thu a tarlang. Minister chuan Mizoramin thla khata Buhfai kan mamawh zat hi 97,000 quintals a ni a, 55,000 quintals hi FCI atanga kan dawn niin, 41,000 Qntls hi a thlawn a kan dawn a ni. A bak zawng hi Open Market Sale Scheme (OMSS)( Domestic) atanga 830/quintal a lei niin, buhfai quality tha zawk lei tuma hmalak chho mek a ni. Tunah chuan Aizawl,Lunglei leh Lawngtlai FCI Godown-a dah tur chu Sairang Rel Station-ah hian a lo thleng tawh dawn a. Bairabi Rel station-ah chuan Mizoram hmar lam Godown-a dah tur a thleng ve tawh thung dawn a ni, a ti.

Supply Minister chuan Sairang Rel station-a buhfai lo thleng tur chungchangah hian Sairang Dinthar Khawtlang hruaitute leh YMA te nen paw’n meeting an neih tawh thu sawiin, Buhfai hi chawlh ni (Sunday)-ah te, zing leh zanah te pawh a lo thlen hun a awm dawn a. Rel station atanga, Sairang Dinthar-a FCI Godown-a motor lianin a thiar a ngai dawn a. Chuvangin Sairang khawtlang nun pawh a tibuaina chin a awm dawn.Hemi kawngah hian Sairang mipuite dawhtheihna leh hriatthiamna pawh a ngen tak zet thu sawiin, Sairang mipuite harsatnaa hma lakpuitu tur Aizawl DC leh SP(Traffic) te hnenah pawh lawmthu a sawi bawk. Minister hian FCI Divisional Office,Divisional Manager Pu Bankim Phonglo leh a staff te leh FCS&CA official te chungah pawh lawmthu a sawi bawk.

Tukin programme-ah hian FCS&CA Minister hi FSCS&CA Secretary Teresy Vanlalhruaii, FCS&CA Addtional Director C Zadailova leh FCI Divisional office-a te leh official thenkhatin an tawiawm a ni.