MOM hnuaia organic Mizo Hmarchate premium price-in hralh

Aizawl | March 26, 2026: Mission Organic Mizoram (MOM) enkawl Farmers Producer Company (FPC) pali te thar chhuah Organic Mizo Hmarcha (Mizo Birds Eye Chilli) chu vawiin khan Premium Price-in hralh chhuah a ni a, vailiam a ni.

Mission Organic Mizoram (MOM) enkawl Farmers Producer Company (FPC) pali – Bungzawl Organic FPC, Chamdur Organic FPC, Laitlang Organic FPC leh Lairam Organic FPC te thar chhuah Organic Mizo Hmarcha (Mizo Birds Eye Chilli) 4.1 Metric Ton chu vawiin khan a vawikhat nan Premium Price ₹480/- in ITC Ltd., Agri Business Division, Guntur, Andra Pradesh, India hnenah kumin chhunga a ṭum khat nan hralh chhuah a ni.

Loneituten Organic Mizo Hmarchate an hralhna man Cheng 19,68,000/- hi a bo a bang awm lovin an dawng nghal vek a ni. Organic Mizo Chilli hralh chhuahte hi Pi Vanramthangi, Director of Agriculture & Farmers’ Welfare Department leh Mission Director, MOM in Ch. Chhunga Bus Terminal, |huampui, Aizawl ațangin a vailiam a ni.

Vailaimna inkhawm tawi buatsaihah hian Pi Baby Lalremkimi, State Co-ordinator, MOM chuan Technical Report pe in, Pi Vanramthangi Director of Agriculture & Farmers’ Welfare Department leh Mission Director, MOM in thu a sawi a. Tun țuma MOM hnuaia Organic FPC - Mizo Hmarchatê chingtute hi Lawngtlai District hnuaia khaw hrang hrangte an ni a. Tun lai hian Mizo Hmarchatê hi Organic ni lo chu ₹ 300/- ațanga ₹ 350/- in hralh a nih lain, Organic thlaite hi hriselna atana țha bik leh hlu bik a nih angin a man pawh a to bik a ni a ti.

Mizo Hmarchatê (Mizo Birds Eye Chilli) te Premium Price-a hralh a nih theihna tur hian Mission Organic Mizoram chuan theihtawp a chhuah a. Agriculture & Farmers Welfare Department Secretary Pi Ramdinliani, IAS leh Mizoram Agriculture Marketing Board (MAMB) lama hotuten nasa taka hma min lakpui bawk avangin hlawhtlinna chang chho zel thei kan ni a, kan lawm takzet a ni a ti bawk.

MOM hnuaia FPC pali (4) ten Mizo Hmarchatê (Mizo Birds Eye Chilli) an hralh chhuah dan chu – Bungzawl FPC ten 0.3 Metric Ton, Chamdur Organic FPC ten 2.5 Metric Ton, Laitlang Organic FPC ten 0.3 Metric Ton leh Lairam Organic FPC ten 1 Metric Ton an hralh chhuak a ni. Heng PFC pali ten Mizo Hmarchatê an thar chhuah hi 11th March, 2026 khan Pesticide Residue Test an paltlang vek a ni.