Mizorama NCC Fest & Parasailing Camp hmasa ber tur atan inbuatsaihna kalpui mek

Aizawl | March 31, 2026: Mizoram Chief Minister Lalduhoma chu nimin khan a pisaah 2 Mizo Battalion NCC Commanding Officer Colonel Sagar K Mohanty chuan hmuin, Mizoram chhim lama NCC ṭhan chhoh dan leh ṭhalaite hmasawnna tura hma lakna hrang hrangte a hrilhfiah.

Col Sagar K Mohanty chuan Mizorama NCC Fest & Parasailing Camp hmasa ber tur, May ni 5–11 chhunga Lungleia buatsaih tum a nih thu sawiin, NCC chungchang hriat zauna tur leh ṭhalaite'n NCC zawm tura fuih phurna tura ruahman a nih thu a sawi a. Khua leh tui ṭha ni tura ṭhalaite chher hriam leh mahni inthunun theihna, inrin tawkna leh huaisenna rilru pu tura kaihhruai chu he hma lakna hian a tum a nih thu a sawi.

Chief Minister chuan Col Sagar K Mohanty hma lakna chu fakin, Mizoram ṭhalaite hmasawnna atana hma lakna pawimawh tak a nih thu a sawi a. NCC chu ṭhalaite nungchang siamtu leh hruaitu nihna kawnga chher hriamtu pawimawh tak a nih thu sawiin, Lungleia NCC Fest hmanpui tura sawmna pawh chu tihhlawhtlin ngei a tum thu leh an hma lakna a phurpui thu a sawi.

NCC Fest-ah hian sawrkar hotu pawimawh leh sipai hotu liante nena inkawmna hun (interactive session) te, NCC chhuak (alumni)-te nena inkawmna hun te a awm dawn a. NCC thil leh hriat tur pawimawh pho chhuahna leh Border Security Force, Assam Rifles leh Territorial Army Bn te ralthuam pho chhuahna te buatsaih a nih dawn bakah, Mizoram tualchhuak puan leh themthiam thil mawi tak tak pho chhuah a ni dawn bawk a. Mizo ei tur chi hrang hrang te pawh chhawp chhuah a ni ang.