Mizoram State Snooker Championship 2025 - 2026 zo fel, Lalrina Renthlei a champion

Aizawl | March 9, 2026: Mizoram Snooker & Billiards Association (MSBA) buatsaih Mizoram State Snooker Championship 2025 - 2026 chu March 2 - 7, 2026 chhung khan MSBA Hall, Hawla Indoor Stadium, Republic Vengthlang-ah khelh a ni a, Lalrina Renthlei a champion.

Mizoram State Snooker Championship 2025 - 2026 final hi inrinni (March 7) zan dar 7 khan khelh a ni a, Final-ah hian Lalrina Renthlei leh PB Liansangzuala te an intum a, inkhel hmuhnawm tak an entir a ni.

Race to 4 a khelh niin, PB-a'n frame la hmasain, 1 - 0 in hma a hruai a, a hnuah Lalrina'n rawn la vein, 1 - 1 an ni a, Rina'n frame a la zawn a, 2 - 1 an ni a. Pb-a'n frame khat a rawn la ve leh a, 2 - 2 an ni.

Hemi hnu hian, Rina'n mawi tak maiin frame a la leh a, 3 - 2 in hma a hruai a, theihtawp chhuaha a beih hnuah, frame a la leh a, 4 - 2 in hnehna a chang ta a ni.

March 6 zan dar 7 khan Semi Final khelh niin, Lalrina Renthlei hian K Lalremruata (Sena) a lo tuk dawl tawh a. PB Liansangzuala hian Lalsangzela a lo hneh tawh bawk a ni.

MSBA hian, March 16 - 21 chhung hian MSSC Golden Jubilee pual 9 Ball Pool Championship a buatsaih leh nghal dawn a, heta tel tur hian mi 100 chuang an inziaklut tawh a, tun kar chhung hian MSBA Hall-ah an practice mek a ni.

MSBA Hall, Hawla Indoor Stadium hi Pathianni tih loh, ni tin chawhnu dar 2 aṭanga zan dar 10 thleng a inhawng a, mi pakhat tan ni khatah cheng 100 chauh chawiin Pool leh Snooker a khelh theih a ni.