A ṭum thum nan YMA Electric Veng Branch-in YMA Chhang zan hmang

Aizawl | March 27, 2026: Young Mizo Association (YMA) Electric Veng Branch chuan March ni 27, 2026 (Zirtawpni) zan khân Electric Veng YMA Hall-ah a ṭum thum nn YMA Chhang Zân an hmang.

He hunah hian, YMA Chhang te hian Hnam lâm hrang hrang - Tlanglâm, Sarlamkai leh Cheraw an entir a, Vakul chang Cultural Club, Electric Veng te'n hnam lam an entir bawk.

Electric Veng Branch YMA Executive Committee Meeting chuan naupangte sikul an chawlh laiin an hun awl tha taka an hman theih nân YMA Chhang thiam zirna hun an buatsaih a. Culture & Music Sub-Committee leh Vakul Chang Cultural Club, Electric Veng te chuan naupangte hi hnam lam, zonun zemawi, nun dan mawite an zirtir thin.

YMA Chhang te hi Central YMA hnuaia din Zone Anti Drugs Squad (ZADS Zone - IV) te chuan ruihhlo that loh zia an zirtir a, Social Welfare Department District Child Protection-te sawmin naupang te dikna leh chanvo chungchang zirtir an ni a, Mizoram Amateur Taekwondo Association (MATA) lamin hun an hman pui bawk.

YMA Chhang zan hi kum 2024 leh 2025 khan hlawhtling takin an lo hmang tawh a, YMA Electric Veng hruaitu, veng chhung nu leh pa te leh naupangte chuan YMA Chhang zân hun hman hi an hlawkpui hle a, chhunzawm zel tlakah an ngai a ni.

YMA Chhang Zanah hian zaithiam Lalsangliana (Taitea) leh Siampuii Ralte te sawm an ni a, YMA Chhang Band (Senior), YMA Chhang Band (Junior) leh Nl. Lalbiakzuali Ralte te an zai bawk.

Electric Veng YMA chuan YMA Chhang te tan hian Electric Veng YMA Hall leh Indoor Stadium leh chu thla khat chuang hawh theih lohin an dah tawp a, YMA Chhang hruaitute an lawm hle.