Zirlai harsate tan a thlawna pekchhuah leh a pung awm loa puk theih turin MZP Students' Aid Fund ruahman

Aizawl | Feb 19, 2026: Mizo Zirlai Pawl (MZP) Students' Aid Fund chungchang ngaihtuahtu Students' Aid Fund Management Committee (SAFMC) chu Vawiin February ni 19, 2026(Ningani) chawhnu dar 2:00 khan, MZP Pisa-ah a vawi khat nan an thukhawm a, meeting hi MZP President & SAFMC Chairperson Dr C Lalremruata'n a kaihruai.

Meeting-ah hian, SAF December ni 10, 2025 a Chief Minister Lalduhoma'n a tlangzarh hnu a dilna lut leh Fund Raising neih dan tur an ngaihtuah ho a, dilna lutte chu meeting chuan puih dan tur leh sum pek tur zat a ruahman nghal bawk.

MZP Students' Aid Fund hi zirlai harsa chhawmdawl ngai a mamawh apiang tan dil theih niin, a thlawn tawpa pekchhuah (grant) leh a pung awm lo a puk (interest - free loan) turin ruahman a ni. Dilna hi MZP Pisapui, Treasury Square-ah Office hour chhungin dilna a thehluh theih reng a ni.

MZPSAFMC-ah hian MZP GHQ President chu chairman a ni a, Secretary-ah MZP GS niin, Treasurer-ah MZP Treasurer a ni a, Member atan hian Hriata Chhangte, Lalremsangi Fanai, Zoparliani Khiangte bakah Joint Hnam pual Chairman leh ACCJSU President te member an ni.