Aizawl | Feb 4, 2026: Mizoram Legislative Assembly Speaker Lalbiakzama chuan nimin khan Khawruhlianah Khawruhlian leh a chhehvel khuate’n an thlai tharte zawrhchhuah nan leh dahthat nana hman tura ruahman, Roadside Agro-based Product Market Building lungphum a phum.
Speaker chuan thu sawiin, Market sak tur chu ‘mipui project’, Khawruhlian chhehvel khua zawng zawng chhawr tur a ni tih a sawi a. Khawruhliana sum leh pai thawhchhuah kawnga hnung tawlh dawrhna, ‘economic collapse’ a thlen loh nana a khaw dinthar dan tur a ngaihtuah nasat thu sawiin, khawchhung kawng siamthat hna chu thawh a ni tawh a, a tul dan azirin a hun bi pangngaia a kal chhoh zel tur thu a sawi a. Link road tha zawk siam dan leh hmun fianrial a nih avangin tourism lama hmalak dan ngaihtuah mek a nih thu a sawi bawk.
Pu Lalbiakzama chuan Market chawm tur tharchhuah leh lakkhawm chu awlsam zawka siam a la ngai dawn tih sawiin, Market chawm tur thlai thar phurchhuahna kawng Agriculture link road mamawh a nih tur thu a sawi a. Market project chu a bial chhunga project hmasa ber a nih angin project lo awm leh zel thawktute tan entawn tlak, department mit tlung, a sak dan thatna kawnga buk lung ni tura a duh thu sawiin, contractor-te chu hna tha taka thawk turin a fuih a. Market chu Khawruhlian leh a chhehvel khua, hmar tlangdungte tan malsawmna lo ni turin duhsakna a hlan a ni.
Agro-based Product Market Building sak tur hi SASCI, 2024-25-Part-V-ah Mizoram sorkar chuan Agriculture & Farmers' Welfare Department-in a implement turin a approve a, hemi atan hian Fund pawh cheng nuai 300 hmuh a ni tawh bawk a ni.
Technical Sanction hi Mizoram PWD pein, contractor atan M/s Tribal Youth Construction, Falkland, Aizawl chu thlan a ni a. Work order pawh pek chhuah a ni tawh a, hna hi thla 12 (sawmpahnih) chhunga thawh zawh tura ruahman a ni.
A Building hi chhawng thuma sak tur niin, a building hian heng – Thlai thar zawrhna hmun; Godown; motor park-na tur; Restaurant; Hall; Manager awmna tur; Farmers Dormitory Mipa leh Hmeichhe tan; Thlaithar dahthatna tur Solar Powered Cold Storage 10 MT – a nei tel dawn a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: