Adviser to CM (Political)-in Mitdel hawrawp leh Sign- language a buatsaih POCSO Act leh a kaihhnawih tlangzarh

Aizawl | Feb 4, 2026: Adviser to Chief Minister (Political) Lalmuanpuia Punte chuan vawiin khan I&PR Conference hall, Lianchhiari Runah, Project Child Law for Everyone, Accessible and Readable (CLEAR) hnuaia kalpui pianphunga rualbanlo naupangte tana buatsaih, POCSO Act leh a kaihhnawihte sign language leh Mitdel Hawrawp (braille) a siam chu khuallian niin a tlangzarh.

Tlangzarh inkhawmah hian Advisor to Chief Minister (political) Lalmuanpuia Punte chuan thusawiin, POCSO Act leh a chhunga hriattur pawimawh zualte braille leh sign language a buatsaih a ni ta chu lawmawm a tih thu a sawi a. Pianphunga rualbanlo naupang ten anmahni tana hamthatna awm angte leh harsatna an tawh pawha humhimtu dan awm angte an hriat ve ngei chu an chanvo a ni tih sawiin, chumi atana Mitdel ten anmahni hawrawp ngei leh ri hriatna lama harsatna nei ten sign language ngeia chutiang dan an nei thei chu ram pum huap pawhin a chhuanawm hle tih a sawi a. Thalaite pawh Special Education chu ngaiven zual tura fuihin, huang pawimawh tak leh midangte tana rawngbawlna zau tak a ni tih hre reng turin a chah a. POCSO Act leh a chhunga pawimawh zualte sign language leh braille-a siam chu Mizoramin bung thar pawimawh tak a kaina leh rualbanlote ngaihsak kawnga mipuite hmasawnna thlentu a nih ngei a beisei tih a sawi bawk a ni.

He hunah hian khual zahawm Commissioner for Persons with Disabilities (PWD) Pi Vanlaldiki Sailo pawhin thusawiin, Project CLEAR hlawtlinna atana thawktu zawng zawngte inpekna chu fakawm a tih thu a sawi a. Kalkhawmte chu pianphunga rualbanlote tana tanpuitu leh an tlakchhamnaah te chhawmdawltu nih tum theuh turin a chah nghal bawk a ni.

Vawiina tlangzarh inkhawmah hian Mizoram State Commision for Protection of Child Rights (MSCPR) hotute leh Social Welfare,Women & Child Development hotute, Mizoramapianphunga rualbanlote tana zirna school hrang hrang hotute leh zirlaite bakah pawl pawimawh tak tak leh mi pawimawh sawm bikte an tel a. Inkhawm hi Pu Darthakunga, Member, MSCPCR chuan kaihruaiin kalkhawmte lawmna thu a sawi a. Pu Jimmy Laltlanmawia, Chairperson, MSCPCR chuan hun hmandan tur tlangpui leh thupui sawizauna hun a hmang a. Pi Vanhmingliani, Member, MSCPCR hnen atangin Project CLEAR kalpui dante technical report ngaihthlak a ni a. Pi Zoramthangi Chhangte, Director, WCD hnen atangin thusawi ngaihthlak niin, Pu R. Laltanpuia, Member, MSCPCR chuan lawmthu sawiin hun hi a khar a ni.