Aizawl | Feb. 20, 2026: Mizo Cultural Organisation (MCO)-in vawiin khan Cultural Centre cum Auditorium, Vaivakawn-ah General Assembly hmangin, kum 2026-2028 atana MCO budget ruahman Rs. 9,13,100 (Rs. nuai 9, sing 1, sang 3 leh 100) an pawm.
MCO general assembly hian Zirna in te puala hnam lama inelna buatsaih rawtna pawh an pawm a. Aia upa zah kawnga inzirtirna nasa zawka kalpui tura hmalak rawtna pawh pawmin, sawrkar nen tangkawpa hnam zia vawnnun kawnga nasa zawka hmalak rawtna leh Mizorama mipui, a bikin khualzin ten an tlawh tam deuh hmuna kut an hman thinah te man chawia hnam thuam hawh theih tur phochhuah dan ngaihtuah rawtna an pawm bawk.
MCO general assembly hi hun thumah then niin, hun khatna chu MCO Vice President John Saikhuma'n kaihhruaiin, report hrang hrang pek a nih bakah MCO President Robert Romawia Royte-in thu sawiin, MCO chu politics rawng kai lo tlawmngai pawl a nih tuh leh hnam tana hlutna te a sawi.
Mizo hnam inpumkhat pawimawh thu pawh sawiin, MCO President chuan hemi kawngah hian hnam lam leh zai te hmanga hmalak theih a nih thu te, Mizoram leh hnam himna tura dawt huaa, thudik tan ngam a tul zia te a sawi a. Hnam humhalh kawnga theihtawp chhuah zel tur leh Mizoram mawina leh Mizo hnam zia leh nunmawi te zau zawka pholan kawngah theihtawp chhuah zel turin kalkhawm te chu a sawm bawk.
MCO General Assembly-ah hian kaltate sunna hun hman a nih bakah MCO general hqrs. executive committee member - a hnathawh that avanga Governor Medal 2026 dawngtu F Zomuanpuia leh MCO Performing Troupe member - Young Talented Award dawngtu Lawmsangzuala te hnenah lawmpuina hlan a ni.
Rorel inkhawm zawh a nih hnu ah Mizoram Journalists' Association (MJA) kaihhruaiin hruaitu thar an thlang a. Kum 2026-2028 chhunga MCO Gen. Hqrs. hruaitu atana thlan thar te chu :
President: Robert Romawia Royte
Vice President: John Saikhuma
Gen. Secretary: Lalbiakhlua
Secretary: Lalhunruata
Treasurer: Lalnuntluangi
Fin. Secretary: B Lalremtluangi
te an ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: