IIMC Aizawl-in 'India AI Impact Summit 2026' - Mizoram State Regional Pre Summit Conference an buatsaih

Aizawl | Feb 5, 2026: Indian Institute of Mass Communication (IIMC), Aizawl chuan 'AI & Media' tih thupuia hmangin vawiin khan an conference hall-ah 'India AI Impact Summit 2026' - Mizoram State Regional Pre Summit Conference an buatsaih.

AI leh Media tih thupui hmanga AI Pre-Summit huaihawt hi India AI impact Summit 2026 lo awm tur atana India hmun hrang hranga a bultanna tura lo buatsaih hmasak a ni a. IIMC Aizawla buatsaih pawh hi IIT, Bombay leh sorkar laipuia Ministry of Electronics & Information Technology te nena buatsaih a ni a. He hunah hian IIMC Aizawla Regional Director charge la mek tu, IIMC Aizawla Officer in Charge (OSD), Pu Nampibou Marinmai, IIS chuan inlawmna thu sawiin IIMC Aizawlin AI Pre-Summit a thleng thei chu lawmawm a tih thu a sawi a. He Summit hian ram hmasawnna tura AI hman tangkai dan leh chiang zawka hriat kawngah nasa taka a puih ngei a beisei thu a sawi a ni.

AI Pre-Summit-ah hian Mizoram University Department of Mass Communication atangin Professor Irene Lalruatkimi, MZU IT Department atangin Associate Professor Dr. R. Chawngsangpuii, IIT Bombay-a Data Manager Nitish Singh, The Frontier Despatch Editor Pu Adam Saprinsanga, Marketing Strategist Pi Angela Roy, Tech Influencer Pu Caleb Friesen leh IIMC Assistant Professor Dr. Jharna Brahma te'n Artificial Intelligence chungchang chu anmahni hna leh subject hawi zawngin kawng hrang hrangin an sawi a. Mizoram University leh pawn lam atangin zirlai, research scholar leh AI kaihhnawih company hrang hrang atangin mipui an kalkhawm a. Mithiamte leh kalkhawm mipuiten sawihona hun an hmang bawk a ni.

AI Pre-Summit hi naktuka chhunzawm tur niin naktukah chuan Workshop buatsaih a ni ang. IIMC hi India rama media lam zirna hlun tak, Ministry of Information & Broadcasting hnuaia din niin Aizawlah chuan Mizoram University ramchhungah North East Regional Campus a awm a. He zirna inah hian course pahnih PG Diploma in English Journalism, kum 1 zir leh MA in New Media Communications, kum 2 zir te a awm mek a. English Journalism-ah zirlai 20 leh MA NMC-ah zirlai 14, an vaiin zirlai 34 an awm mek a ni.